باجوڑ: لوئی ماموند کے علاقے میں مکان کی چھت گرنے کا انتہائی افسوسناک حادثہ،

خیبر پختونخوا کے ضلع باجوڑ سے ایک انتہائی دلخراش اور افسوسناک واقعہ سامنے آیا ہے، جہاں تحصیل لوئی ماموند کے علاقے گڑیگال میں ایک رہائشی مکان کے کمرے کی چھت اچانک گرنے سے دو افراد جاں بحق ہو گئے۔ مقامی پولیس حکام کی جانب سے جاری کردہ ابتدائی رپورٹ کے مطابق ملبے تلے دب کر جاں بحق ہونے والوں میں ایک 60 سالہ معمر خاتون (زوجہ مشنگ) اور 9 سالہ معصوم  ذیشان شامل ہیں۔ حادثے کی اطلاع ملتے ہی مقامی لوگ اور امدادی ٹیمیں فوری طور پر جائے وقوعہ پر پہنچیں، تاہم شدید چوٹوں کے باعث دونوں افراد موقع پر ہی دم توڑ چکے تھے۔

پولیس ذرائع کا کہنا ہے کہ یہ دلدوز حادثہ مکان کی چھت انتہائی بوسیدہ اور خستہ حال ہونے کے باعث پیش آیا، جو اچانک وزن برداشت نہ کرتے ہوئے زمین بوس ہو گئی۔ ریسکیو حکام نے مقامی آبادی کی مدد سے لاشوں کو ملبے سے نکال کر ضروری قانونی کارروائی کے بعد ورثا کے حوالے کر دیا ہے۔ واقعے کے بعد پورے علاقے کی فضا سوگوار ہو گئی ہے اور عوامی حلقوں نے پسماندہ اضلاع میں غریب خاندانوں کے خستہ حال مکانات کی مرمت اور حکومتی امداد کی ضرورت پر زور دیا ہے۔