قاہرہ/اسلام آباد:  مصر میں جاری ورلڈ اسکواش چیمپئن شپ میں پاکستان کے ابھرتے ہوئے کھلاڑی نور زمان نے شاندار کارکردگی کا مظاہرہ کرتے ہوئے پہلے راؤنڈ میں کامیابی حاصل کر لی ہے۔ نور زمان نے اعصاب شکن مقابلے کے بعد میزبان ملک مصر کے کھلاڑی ایڈم حول کو شکست دے کر ایونٹ کا کامیاب آغاز کیا۔

دونوں کھلاڑیوں کے درمیان کھیلا گیا یہ میچ انتہائی سنسنی خیز رہا جو پانچ گیمز تک طویل ہوا۔ نور زمان نے کھیل کے آغاز سے ہی جارحانہ انداز اپنایا اور مصر کے ایڈم حول کو ہوم گراؤنڈ پر سخت ٹکر دی۔ نور کی جیت کا اسکور 9-11، 11-5، 7-11، 11-9 اور 8-11 رہا۔ اس فتح کے ساتھ ہی نور زمان نے اگلے مرحلے کے لیے اپنی پوزیشن مستحکم کر لی ہے۔

دوسری جانب، پاکستان کے ایک اور تجربہ کار کھلاڑی عاصم خان کو پہلے راؤنڈ میں مشکل حریف کا سامنا کرنا پڑا۔ انہیں ایونٹ کے سیڈ 5 کھلاڑی جوئیل ماکن نے شکست دے کر ٹورنامنٹ سے باہر کر دیا۔ ایونٹ میں شریک پاکستان کے تیسرے کھلاڑی عشب عرفان آج اپنے پہلے میچ میں ایکشن میں نظر آئیں گے، جن سے قوم کو بڑی توقعات وابستہ ہیں۔