پشاور (حسبان میڈیا ): پشاور کے علاقے تہکال پلوسئی میں ٹک ٹاک ویڈیو بنانے کے شوق نے ایک ہنستے بستے گھرانے کو اجاڑ دیا۔ پانچویں جماعت کا طالب علم، اویس، گھر میں شیشے کے سامنے پستول تھامے ویڈیو بنانے میں مصروف تھا کہ اچانک گولی چل جانے سے شدید زخمی ہو گیا اور بعد ازاں زخموں کی تاب نہ لاتے ہوئے دم توڑ گیا۔

مقتول کے والد سیف الرحمان کے مطابق، واقعے کے وقت گھر کے دیگر بچے اسکول گئے ہوئے تھے اور ایک معمولی غلطی نے خاندان کو کبھی نہ بھرنے والا زخم دے دیا۔ پولیس کا کہنا ہے کہ بچہ اسکول کی سرگرمیوں کے لیے موبائل فون استعمال کرتا تھا، تاہم سوشل میڈیا کے غیر ذمہ دارانہ استعمال اور اسلحے کے ساتھ چھیڑ چھاڑ اس کی موت کا سبب بنی۔ پولیس نے واقعے کی تحقیقات شروع کر دی ہیں اور والدین پر زور دیا ہے کہ وہ بچوں کی آن لائن سرگرمیوں اور موبائل کے استعمال پر سخت نظر رکھیں۔ اس دلخراش واقعے نے ایک بار پھر معاشرے میں بڑھتے ہوئے خطرناک سوشل میڈیا رجحانات اور گھروں میں اسلحے کی موجودگی پر کئی سوالات کھڑے کر دیے ہیں۔