ورلڈکپ کے فاتح ٹیم کو 23لاکھ 40 ہزار ڈالر ز انعامی رقم دی جائیگی جبکہ رنراپ ٹیم کو 11 لاکھ 70 ہزار ڈالرز دئیے جائیں گے۔ مجموعی انعام رقم میں 2024 ایونٹ کے رقم سے 10 فیصد اضافہ کیاگیاہے۔ تمام حصہ لینے والی 12 ٹیموں کیلئے 2لاکھ 47 ہزار پانچ سو ڈالرز کی رقم رکھی گئی ہے۔

انٹرنیشنل کرکٹ کونسل آئی سی سی نے ویمنز ٹی20 ورلڈ کپ 2026 کے لیے تاریخ کی بلند ترین انعامی رقم کا اعلان کر دیا ہے، جس کے تحت مجموعی پرائز منی 87 لاکھ 64 ہزار 615 امریکی ڈالر مقرر کی گئی ہے۔ یہ رقم 2024 کے ایڈیشن کے مقابلے میں 10 فیصد زیادہ ہے، جو خواتین کرکٹ کے بڑھتے ہوئے عالمی اثر و رسوخ کی عکاسی کرتی ہے۔

آئی سی سی کے مطابق ایونٹ کی فاتح ٹیم کو 23 لاکھ 40 ہزار ڈالر جبکہ رنر اپ کو 11 لاکھ 70 ہزار ڈالر دیے جائیں گے۔ سیمی فائنل میں شکست کھانے والی ٹیموں کے لیے 6 لاکھ 75 ہزار ڈالر مختص کیے گئے ہیں، جبکہ ہر گروپ میچ میں کامیابی پر ٹیم کو 31 ہزار 154 ڈالر ملیں گے۔ اس کے علاوہ ٹورنامنٹ میں شریک تمام 12 ٹیموں کے لیے کم از کم 2 لاکھ 47 ہزار 500 ڈالر کی انعامی رقم یقینی بنائی گئی ہے۔

یہ ٹورنامنٹ 12 جون سے انگلینڈ کے شہر برمنگھم میں شروع ہوگا، جہاں افتتاحی میچ میں میزبان انگلینڈ ویمنز کرکٹ ٹیم اور سری لنکا ویمنز کرکٹ ٹیم کے درمیان کھیلا جائیگا۔ پہلی بار اس عالمی ایونٹ میں 12 ٹیمیں شرکت کریں گی، جن میں آسٹریلیا، بھارت، پاکستان، نیوزی لینڈ، جنوبی افریقہ، ویسٹ انڈیز، بنگلہ دیش، آئرلینڈ، اسکاٹ لینڈ اور نیدرلینڈز شامل ہیں۔ 33 میچز پر مشتمل یہ ایونٹ 24 دنوں تک سات مختلف مقامات پر کھیلا جائے گا۔

ٹورنامنٹ کے آغاز سے قبل ٹرافی ٹور بھی شروع کر دیا گیا ہے، جو یورپ کے مختلف ممالک اور میزبان شہروں کا دورہ کرے گا۔ اس مہم کا افتتاح لندن میں تاریخی Lord’s Cricket Ground میں کیا گیا، جہاں پہلی بار مشہور پویلین پر خصوصی پروجیکشن کے ذریعے ٹرافی کی نمائش کی گئی۔

ٹرافی ٹور کے دوران یہ اعزازی ٹرافی نیدرلینڈز، آئرلینڈ اور اسکاٹ لینڈ سمیت یورپ کے مختلف ممالک کا دورہ کرے گی، جس کے بعد مئی کے دوران انگلینڈ کے میزبان شہروں میں عوامی نمائش کی جائے گی۔ اس اقدام کا مقصد شائقین کو ایونٹ کے قریب لانا اور خواتین کرکٹ کے فروغ کے لیے جوش و خروش پیدا کرنا ہے۔
آئی سی سی کے چیف ایگزیکٹو سنجوج گپتا کا کہنا ہے کہ خواتین کرکٹ تیزی سے ترقی کر رہی ہے اور ورلڈ کپ میں ٹیموں کی تعداد میں اضافہ اور ریکارڈ انعامی رقم اس عزم کا ثبوت ہے کہ کھیل کو مزید مضبوط اور مسابقتی بنایا جائے۔ انہوں نے اس امید کا اظہار کیا کہ یہ ایونٹ نہ صرف نئے ریکارڈ قائم کرے گا بلکہ عالمی سطح پر خواتین کھلاڑیوں کے اثر و رسوخ کو مزید بڑھائے گا۔
ٹورنامنٹ ڈائریکٹر بیتھ بیریٹ وائلڈ کے مطابق ویمنز ٹی20 ورلڈ کپ 2026 خواتین کرکٹ کی تاریخ کا ایک اہم سنگِ میل ثابت ہوگا، جہاں ریکارڈ شائقین کی آمد اور عالمی توجہ متوقع ہے۔ انہوں نے کہا کہ ٹرافی ٹور اس ایونٹ کی تشہیر میں کلیدی کردار ادا کرے گا اور اسے دنیا بھر کے شائقین تک پہنچانے میں مدد دے گا۔مجموعی طور پر یہ ایونٹ نہ صرف کھیل کے میدان میں بلکہ سماجی اور ثقافتی سطح پر بھی خواتین کرکٹ کے لیے ایک نئے دور کا آغاز ثابت ہونے جا رہا ہے۔

آئی سی سی ویمنز ٹی ٹوئنٹی ورلڈ کپ ٹرافی مندرجہ ذیل تاریخوں پر میزبان شہروں کا دورہ کرے گی۔

سکاٹ لینڈ: 07 سے 10 مئی
نیدرلینڈز: 11 سے 14 مئی
آئرلینڈ: 15 سے 18 مئی
لیڈز: 19-24 مئی
مانچسٹر: 25-27 مئی
برمنگھم: 28 - 29 مئی
برسٹل: 31 مئی - 1 جون
ساؤتھمپٹن: 3-4 جون
لندن: 5 تا 8 جون