ملک میں مہنگائی کے بڑھتے ہوئے دباؤ کے درمیان خوردنی گھی اور کوکنگ آئل کی قیمتوں میں نمایاں اضافے کا خدشہ ظاہر کیا جا رہا ہے، جس سے صارفین کی مشکلات میں مزید اضافہ ہو سکتا ہے۔

 پاکستان بناسپتی مینوفیکچرز ایسوسی ایشن کے ذرائع کے مطابق گھی اور تیل کی فی کلو قیمت میں 100 سے 150 روپے تک اضافہ متوقع ہے۔ صنعت سے وابستہ نمائندوں کا کہنا ہے کہ حالیہ دنوں میں پیداواری لاگت میں غیر معمولی اضافہ دیکھنے میں آیا ہے، جس نے قیمتوں کو اوپر لے جانے کا دباؤ بڑھا دیا ہے۔

ایسوسی ایشن کے مشیروں کے مطابق پٹرولیم کی قیمتوں  میں اضافے نے اس صورتحال کو مزید پیچیدہ بنا دیا ہے۔ ٹرانسپورٹیشن اخراجات اور فیکٹریوں میں پیداواری لاگت اس حد تک بڑھ چکی ہے کہ موجودہ قیمتوں پر کاروبار جاری رکھنا مشکل ہوتا جا رہا ہے۔

صنعتی حلقوں نے حکومت سے مطالبہ کیا ہے کہ فوری طور پر ایک مؤثر کمیٹی یا پینل تشکیل دیا جائے، جو بڑھتی ہوئی لاگت کو قابو میں لانے اور عوام کو ممکنہ مہنگائی کے بوجھ سے بچانے کے لیے قابل عمل حکمت عملی پیش کرے۔

ماہرین کے مطابق اگر بروقت اقدامات نہ کیے گئے تو گھی اور تیل جیسی بنیادی اشیائے خورونوش کی قیمتوں میں اضافہ عام آدمی کے گھریلو بجٹ پر مزید دباؤ ڈال سکتا ہے۔