حکومت نے جنوری 2027 سے بے نظیر انکم سپورٹ پروگرام (BISP) کی رقم 14,500 روپے سے بڑھا کر 19,500 روپے کرنے کا فیصلہ کیا ہے۔

مالی سال 2026 کے اختتام تک، 200,000 مزید خاندان اس پروگرام میں شامل ہوں گے، جس سے فائدہ اٹھانے والے خاندانوں کی کل تعداد 12 ملین تک پہنچ جائے گی۔

ذرائع کے مطابق وزارت خزانہ نے کہا کہ آئی ایم ایف نے پیٹرولیم مصنوعات پر سبسڈی نہ دینے کا مطالبہ کیا تھا جس پر حکومت نے صوبوں کو ہدایت کی ہے کہ وہ اپنی مالی پوزیشن کے مطابق اپنے بجٹ سے پسماندہ طبقات کے لیے ٹارگٹڈ سبسڈی فراہم کریں۔

ذرائع کا کہنا ہے کہ پیٹرولیم مصنوعات کی قیمتیں عالمی مارکیٹ کے مطابق ہوں گی جب کہ گزشتہ ماہ تقریباً 3.5 ارب روپے کی اضافی لیوی وصول کی گئی تھی۔ ملک بھر میں پیٹرول کی کھپت میں تقریباً 24 فیصد اضافہ ہوا۔

کسانوں کے تحفظ کے لیے یہ فیصلہ کیا گیا کہ آئندہ مالی سال میں کھاد پر فیڈرل ایکسائز ڈیوٹی (ایف ای ڈی) نہیں لگائی جائے گی۔

بی آئی ایس پی ذرائع نے بتایا کہ پروگرام کے تحت ہر خاندان کو جنوری 2027 سے 19,500 روپے دیے جائیں گے جبکہ مالی سال 2026 کے اختتام تک مزید 200,000 خاندانوں کو شامل کیا جائے گا۔حکومت نے آئی ایم ایف کو تحریری طور پر یقین دہانی بھی کرائی ہے کہ پروگرام کے تحت مستفید ہونے والے خاندانوں کی تعداد میں اضافہ ہوتا رہے گا۔

یہ قدم پسماندہ افراد کو مالی امداد فراہم کرنے اور سماجی تحفظ کے نظام کو مضبوط بنانے کے لیے اٹھایا گیا ہے۔