ملک کے مختلف حصوں میں آج سے 30 مارچ تک تیز ہواؤں کے ساتھ بارشوں کا نیا سلسلہ متوقع ہے، جس کے پیش نظر متعلقہ اداروں نے پیشگی الرٹ جاری کر دیا ہے۔ محکمہ موسمیات کا کہنا ہے کہ اس موسمی نظام کے اثرات ملک کے بیشتر علاقوں میں محسوس کیے جائیں گے۔

محکمہ موسمیات کے مطابق بلوچستان، خیبر پختونخوا، پنجاب، سندھ، اسلام آباد، گلگت بلتستان اور آزاد کشمیر کے مختلف علاقوں میں بارش کے ساتھ ساتھ کہیں کہیں فلیش فلڈنگ کا بھی خطرہ موجود ہے۔ بعض علاقوں میں موسلادھار بارشوں کے باعث ندی نالوں میں طغیانی کی صورتحال پیدا ہو سکتی ہے، جیسا کہ بلوچستان کے شہر نوشکی اور اس کے گردونواح میں حالیہ بارشوں کے نتیجے میں دیکھنے میں آیا۔

دوسری جانب کراچی میں بھی آئندہ چند روز کے دوران بارش کا امکان ظاہر کیا گیا ہے۔ محکمہ موسمیات کے مطابق شہر میں آج، کل، 28 اور 29 مارچ کو بارش ہو سکتی ہے، جبکہ بعض مقامات پر ژالہ باری کا امکان بھی موجود ہے۔

متوقع موسمی صورتحال کے پیش نظر سندھ حکومت نے انتظامیہ کو ہائی الرٹ رہنے کی ہدایت جاری کر دی ہے۔ چیف سیکرٹری سندھ نے تمام متعلقہ افسران کو فیلڈ میں موجود رہنے اور کسی بھی ہنگامی صورتحال سے نمٹنے کے لیے مکمل تیاری رکھنے کا حکم دیا ہے۔ کراچی کے کمشنرز، ڈپٹی کمشنرز اور اسسٹنٹ کمشنرز کو آئندہ ایک ہفتے تک متحرک رہنے کی ہدایات دی گئی ہیں تاکہ شہریوں کو ممکنہ نقصانات سے بچایا جا سکے۔