لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کے 11ویں ایڈیشن کے لیے اپنے منصوبوں میں نمایاں تبدیلیاں کرتے ہوئے اعلان کیا ہے کہ ٹورنامنٹ اب صرف دو شہروں میں اور شائقین کے بغیر منعقد کیا جائے گا۔

پی سی بی کے چیئرمین محسن نقوی نے میڈیا کانفرنس کے دوران نئی حکمت عملی کا اعلان کرتے ہوئے بتایا کہ یہ فیصلہ پی ایس ایل فرنچائز مالکان کے ساتھ مشترکہ اجلاس اور وزیر اعظم شہباز شریف (پیٹرن اِن چیف) سے مشاورت کے بعد کیا گیا۔

ابتدائی طور پر ملتان، پشاور، فیصل آباد، کراچی، راولپنڈی اور لاہور کو میزبان شہروں کے طور پر زیر غور لایا گیا تھا، تاہم اب تمام میچز صرف کراچی اور لاہور میں کھیلے جائیں گے۔ مزید برآں اخراجات میں کمی کے پیش نظر افتتاحی تقریب بھی منسوخ کر دی گئی ہے۔

محسن نقوی کا کہنا تھا کہ “پی ایس ایل کے انعقاد سے متعلق کئی روز سے مشاورت جاری تھی۔ موجودہ صورتحال کی مدت کا اندازہ نہیں، تاہم لیگ کا انعقاد ناگزیر ہے کیونکہ یہ ایک بین الاقوامی برانڈ بن چکا ہے اور اس میں غیر ملکی کھلاڑی بھی شریک ہوتے ہیں۔”

انہوں نے واضح کیا کہ ٹورنامنٹ اپنے طے شدہ شیڈول کے مطابق 26 مارچ سے شروع ہوگا۔ ان کے مطابق اگر لیگ کو مؤخر کیا جاتا تو بعد میں اس کے انعقاد کے لیے کوئی مناسب وقت دستیاب نہ ہوتا، اسی لیے نیا شیڈول ٹیموں کی نقل و حرکت کو کم سے کم رکھتے ہوئے ترتیب دیا گیا ہے۔

پی سی بی نے یہ بھی اعلان کیا کہ ابتدائی میچز بند دروازوں کے پیچھے کھیلے جائیں گے اور شائقین کو اسٹیڈیم میں داخلے کی اجازت نہیں ہوگی۔ ٹکٹ خریدنے والے افراد کے لیے رقم واپسی کا اعلان کرتے ہوئے چیئرمین نے اس صورتحال پر معذرت بھی کی۔

انہوں نے مزید کہا کہ پی سی بی کے مستقل ملازمین کو ایونٹ میں شرکت کی اجازت نہیں ہوگی، تاہم پارٹ ٹائم عملہ ٹیموں کے ساتھ کام جاری رکھ سکے گا۔

پی ایس ایل کے چیف ایگزیکٹو آفیسر سلمان نصیر نے بھی اس فیصلے کی تائید کرتے ہوئے کہا کہ تمام اسٹیک ہولڈرز کی خواہش ہے کہ لیگ ہر صورت منعقد ہو۔

نئے شیڈول کے مطابق ہر ٹیم 10 میچز کھیلے گی جبکہ ٹاپ چار ٹیمیں پلے آف مرحلے کے لیے کوالیفائی کریں گی۔ پلے آف میں کوالیفائر 1، ایلیمنیٹر، کوالیفائر 2 اور فائنل شامل ہوگا۔

فائنل میچ 3 مئی کو لاہور کے قذافی اسٹیڈیم میں شیڈول ہے جبکہ 4 مئی کو ریزرو ڈے کے طور پر مختص کیا گیا ہے۔

یاد رہے کہ اس سے قبل قذافی اسٹیڈیم کو سب سے زیادہ 15 میچز کی میزبانی دی گئی تھی جبکہ راولپنڈی، فیصل آباد، کراچی اور ملتان کے اسٹیڈیمز کو بھی مختلف تعداد میں میچز دینے کا منصوبہ بنایا گیا تھا، تاہم نئی حکمت عملی کے تحت شیڈول کو محدود کر دیا گیا ہے۔

پی سی بی حکام نے امید ظاہر کی ہے کہ خطے کی صورتحال جلد معمول پر آئے گی اور مستقبل میں شائقین دوبارہ اسٹیڈیمز کا رخ کر سکیں گے