آئی سی سی مینز ٹی ٹونٹی ورلڈ کپ  کے سپر 8 مرحلے میں پاکستان نے سنسنی خیز مقابلے کے بعد سری لنکا کو 5 رنز سے شکست دے دی، تاہم بہتر رن ریٹ کی شرط پوری نہ ہونے کے باعث قومی ٹیم ٹورنامنٹ کے سیمی فائنل میں جگہ بنانے میں ناکام رہی۔کینڈی میں کھیلے گئے اہم میچ میں سری لنکن کپتان نے ٹاس جیت کر پاکستان کو پہلے بیٹنگ کی دعوت دی۔ پاکستانی بلے بازوں نے جارحانہ انداز اپناتے ہوئے مقررہ 20 اوورز میں 8 وکٹوں کے نقصان پر 212 رنز کا بڑا مجموعہ ترتیب دیا۔ہدف کے تعاقب میں سری لنکا نے بھرپور مقابلہ کیا اور 6 وکٹوں پر 207 رنز تک رسائی حاصل کی، تاہم وہ فتح سے پانچ رنز کی دوری پر رہ گئی۔ پاکستان کی جانب سے ابرار احمد نے تین وکٹیں حاصل کیں جبکہ نسیم شاہ نے ایک کھلاڑی کو آؤٹ کیا۔

پاکستان کی اننگز کی بنیاد اوپنرز صاحبزادہ فرحان اور فخر زمان نے رکھی، جنہوں نے پہلی وکٹ کے لیے 176 رنز کی شاندار شراکت قائم کی، جو ٹی ٹوئنٹی ورلڈ کپ کی تاریخ کی سب سے بڑی اوپننگ پارٹنرشپ قرار دی جا رہی ہے۔صاحبزادہ فرحان نے ذمہ دارانہ اور جارحانہ بیٹنگ کا امتزاج پیش کرتے ہوئے 60 گیندوں پر 100 رنز کی اننگز کھیلی، جو ان کی ایونٹ میں دوسری سنچری تھی۔ دوسری جانب فخر زمان نے 42 گیندوں پر 84 رنز بنا کر ٹیم کو مضبوط پوزیشن فراہم کی۔ اس ایڈیشن میں دو سنچریاں بنانے کے ساتھ ہی صاحبزادہ فرحان ایک ہی ورلڈ کپ میں دو سنچریاں اسکور کرنے والے پہلے کھلاڑی بن گئے۔

اہم میچ میں ٹیم مینجمنٹ نے حیران کن فیصلے کرتے ہوئے بابر اعظم، صائم ایوب اور سلمان مرزا کو پلیئنگ الیون میں شامل نہیں کیا۔ ان کی جگہ نسیم شاہ، خواجہ نافع اور ابرار احمد کو ٹیم کا حصہ بنایا گیا۔اگرچہ پاکستان نے میچ جیت لیا، تاہم سیمی فائنل میں رسائی کے لیے اسے سری لنکا کو 147 رنز تک محدود رکھنا ضروری تھا، جو ممکن نہ ہو سکا۔ اس گروپ سے نیوزی لینڈ قومی کرکٹ ٹیم نے سیمی فائنل کے لیے کوالیفائی کر لیا، جبکہ انگلینڈ قومی کرکٹ ٹیم پہلے ہی آخری چار میں جگہ بنا چکی تھی۔ سری لنکا بھی ایونٹ سے باہر ہو گیا۔یوں پاکستان نے ایک یادگار فتح تو حاصل کی، مگر رن ریٹ کی سخت شرط کے باعث اس کا ورلڈ کپ سفر سپر 8 مرحلے پر ہی اختتام پذیر ہو گیا۔