آئی سی سی ٹی ٹونٹی ورلڈ کپ کے میچ کے دوران پاکستان قومی کرکٹ ٹیم اور اور نیمیبیا قومی کرکٹ ٹیم کے میچ میں ڈگ آؤٹ کا ایک منظر سوشل میڈیا پر غیر معمولی توجہ حاصل کرگیا۔
وائرل ویڈیو میں قومی کپتان سلمان علی اغا کو آؤٹ ہونے کے بعد شدید جذباتی کیفیت میں دیکھا گیا، جہاں وہ قومی ٹیم کے ہیڈ کوچ مائیک ہسن سے گفتگو کے دوران برہم دکھائی دیے۔ ایک موقع پر انہوں نے غصے میں پانی کی بوتل زمین پر دے ماری، جبکہ کوچ تحمل سے انہیں سمجھاتے رہے۔
اسی دوران بابر اعظم بھی ڈگ آؤٹ میں موجود تھے اور صورتحال کا سنجیدگی سے مشاہدہ کرتے رہے۔
سابق وکٹ کیپر کامران اکمل اور سابق ٹیسٹ کرکٹر باسط علی نے اس واقعے کو محض کپتان کے آؤٹ ہونے کے بعد کی فطری مایوسی قرار دیا۔ ان کے مطابق یہ کوئی باقاعدہ تنازع نہیں بلکہ میچ کے دباؤ کا وقتی اظہار تھا۔
یہ واقعہ قومی ٹیم کی اندرونی فضا اور قیادت پر بڑھتے دباؤ کی عکاسی کرتا ہے، خاص طور پر ایسے حالات میں جب ماضی میں بھی کوچنگ عملے اور کھلاڑیوں کے درمیان اختلافات کی خبریں گردش کرتی رہی ہیں۔
واضح رہے کہ پاکستان نے نمیبیا کو 102 رنز سے شکست دے کر سپر ایٹ مرحلے میں جگہ بنا لی، تاہم ڈگ آؤٹ کی یہ ویڈیو شائقین اور مبصرین کے درمیان بحث کا نیا موضوع بن چکی ہے۔
