ہمیں دیوار سے نہ لگایا جائے،اس خطے میں نئی جنگ کی بنیاد رکھی جارہی ہے۔اسد قیصر

صوابی ۔ پاکستان تحریک انصاف کے مرکزی رہنما تحریک تحفظ آئین پاکستان کے سیکرٹری جنرل اور سابق سپیکر قومی اسمبلی اسد قیصر نے کہا کہ خیبر پختو نخوا طویل عرصے سے دہشت گردی جنگوں اور ریاستی بے توجہی کا شکار رہا ہے 8 کروڑ روپے کی لاگت سے نو تعمیر شدہ جدید جنرل بس اسٹینڈ ٹوپی صوابی کی افتتاحی تقریب سے خطاب کرتے ہوئے انہوں نے کہا کہ افغان جنگ نے ہمارے صوبے کو شدید متاثر کیا' یہاں کلاشنکوف کلچر پروان چڑھا، معیشت تباہ ہوئی اور آج تک عوام اس کے نقصانات بھگت رہے ہیں۔

اسد قیصر نے خبر دار کیا کہ ایک بار پھر اس خطے میں نئی جنگ کی بنیاد رکھی جارہی ہے، مگر عوام اس کے متحمل نہیں ہو سکتے ۔ انہوں نے مطالبہ کیا کہ سفارت کاری کو موقع دیا جائے اور وہ ممالک جو امن کے لئے کوشش کر رہے ہیں، وہ اپنی کوششیں جاری رکھیں۔

عمران خان کی جیل میں ملاقاتوں سے متعلق بات کرتے ہوئے انہوں نے کہا کہ انہیں جیل قوانین کے مطابق ملاقات کی اجازت نہیں دی جا رہی حالانکہ جیل مینوئل کے مطابق ہر قیدی کو ملاقات کا حق حاصل ہے۔

انہوں نے کہا کہ عمران خان ملک کے سابق وزیر اعظم ہیں اور ان کے خاندان اور وزیر اعلی خیبر پختو نخوا سے ملاقات نہ کروانا بنیادی انسانی حقوق کی خلاف ورزی ہے۔

انہوں نے حکومت کو متنبہ کرتے ہوئے کہا کہ ہمیں دیوار سے نہ لگایا جائے۔ اگر ہمیں جینے نہیں دیں گے تو ہم آپ کو بھی جینے نہیں دیں گے۔ انہوں نے کہا کہ ہم قانون اور آئین پر یقین رکھتے ہیں اور چاہتے ہیں کہ تمام فیصلے آئینی دائرہ کار میں رہتے ہوئے ہوں۔