منشیات کی طرف رجحان کی وجہ؟خار کے نوجوانوں کا سوال: کیا ہم کھیلنے کے بھی مستحق نہیں؟

محمد عاصم

باجوڑ کے ہیڈکوارٹر خار کی آبادی تقریباً 70 سے 80 ہزار لوگوں پر مشتمل ہے، لیکن افسوس کی بات یہ ہے کہ اس پورے علاقے میں نوجوانوں کے لیے ایک بھی مناسب کھیل کا میدان (پلے گراؤنڈ) موجود نہیں ہے۔ یہ صورتحال نہ صرف پریشان کن ہے بلکہ ہمارے معاشرے کے لیے شرمندگی کا باعث بھی ہے۔ نوجوان کھلاڑیوں کو اپنے شوق پورے کرنے کے لیے نجی طور پر کرائے کے میدان لینے پر مجبور کیا جاتا ہے، جو کہ بہت ہی افسوسناک ہے۔
خار کے نوجوانوں کو کھیلوں کی سہولیات فراہم کرنا حکومت کی پہلی ذمہ داریوں میں سے ایک ہے۔ کھیل نہ صرف نوجوانوں کی صحت کے لیے ضروری ہیں بلکہ یہ معاشرے میں اچھی سرگرمیوں کو بڑھانے کا بھی ایک ذریعہ ہیں۔ لیکن بدقسمتی سے، ہمارے منتخب نمائندوں نے اس اہم مسئلے پر توجہ نہیں دی ہے۔
اس سلسلے میں ہمارے منتخب نمائندوں، خاص طور پر ایم این اے مبارک زیب خان اور ایم پی اے نثار باز سے اپیل ہے کہ وہ خار کے نوجوانوں کے لیے فوری طور پر ایک پلے گراؤنڈ بنانے کے لیے اقدامات کریں۔ اس کے علاوہ، سپورٹس ڈیپارٹمنٹ کو بھی چاہیے کہ وہ اس معاملے پر توجہ دے اور خار کے نوجوانوں کو کھیلوں کی بنیادی سہولیات فراہم کرے۔
علی عسکر (پرنسپل رفاہ ماڈل اسکول اور فٹبالر) کا کہنا ہے:
"خار کے نوجوانوں کو کھیلوں کے لیے مناسب سہولیات نہ ملنا بہت ہی افسوسناک ہے۔ کھیل نوجوانوں کی ذہنی اور جسمانی صحت کے لیے بہت ضروری ہیں۔ ہمارے نوجوانوں میں پلے گراؤنڈ نہ ہونے کی وجہ سے منشیات کا رجحان بڑھ رہا ہے، جو کہ ہمارے معاشرے کے لیے بہت خطرناک ہے۔ حکومت کو چاہیے کہ وہ فوری طور پر اس مسئلے کو حل کرے اور نوجوانوں کو کھیلوں کے مواقع فراہم کرے۔"
حسیب اللہ (سماجی کارکن اور فٹبالر) کا کہنا ہے:
"خار کے نوجوانوں کو کھیلوں کے لیے میدان نہ ملنا ایک بڑا مسئلہ ہے۔ الیکشن کے دوران تمام سیاسی لوگ یہاں آتے ہیں، نوجوانوں کے ساتھ وعدے کرتے ہیں کہ ہم آپ کے لیے پلے گراؤنڈ بنائیں گے، لیکن الیکشن ختم ہوتے ہی ان کا پتہ تک نہیں چلتا۔ کوئی بھی سیاسی شخصیت ہمارے پاس واپس نہیں آتی اور نہ ہی ہمارے حالات پوچھتی ہے۔ ہماری حکومت کو چاہیے کہ وہ نوجوانوں کے مستقبل کو بہتر بنانے کے لیے فوری اقدامات کرے۔ کھیل نوجوانوں کو اچھی سرگرمیوں کی طرف لاتے ہیں اور انہیں بری سرگرمیوں سے دور رکھتے ہیں۔"
یہ وقت کا تقاضا ہے کہ ہمارے منتخب نمائندے اور متعلقہ محکمے اس مسئلے پر فوری توجہ دیں اور خار کے نوجوانوں کے لیے ایک مناسب پلے گراؤنڈ بنانے کے لیے اقدامات کریں۔ نوجوان ہمارے معاشرے کا مستقبل ہیں، اور انہیں کھیلوں کی سہولیات فراہم کرنا ہم سب کی ذمہ داری ہے۔
امید ہے کہ اس مضمون کے ذریعے خار کے نوجوانوں کی آواز کو سنا جائے گا اور ان کے لیے ایک پلے گراؤنڈ بنانے کے لیے فوری اقدامات کیے جائیں گے