واشنگٹن / بیجنگ (حسبان میڈیا رپورٹ): عالمی سفارتی محاذ پر ایک غیر معمولی اور بڑی پیش رفت سامنے آئی ہے، جہاں وائٹ ہاؤس نے باضابطہ طور پر اس امر کی تصدیق کر دی ہے کہ امریکی صدر ڈونلڈ ٹرمپ چین میں اپنے چینی ہم منصب شی جن پنگ اور روسی صدر ولادیمیر پیوٹن سے اہم ملاقات کریں گے۔ وائٹ ہاؤس کے ترجمان کے مطابق اس سہ فریقی بیٹھک کے ایجنڈے میں جوہری ہتھیاروں میں کمی اور اسلحے کے کنٹرول سے متعلق معاملات سرفہرست ہوں گے۔

قبل ازیں امریکی جریدے "نیویارک پوسٹ" نے اپنی ایک رپورٹ میں دعویٰ کیا تھا کہ امریکا، چین اور روس کے سربراہانِ مملکت کے مابین یہ اہم ملاقات جمعرات کے روز چین کے شہر شینزن میں متوقع ہے۔ رپورٹ کے مطابق اس اعلیٰ سطحی اجلاس میں جوہری ہتھیاروں کے پھیلاؤ کو روکنے کے ساتھ ساتھ یوکرین جنگ، ایران کی صورتحال اور شمالی کوریا کے جوہری پروگرام جیسے حساس عالمی تنازعات پر بھی تفصیلی تبادلہ خیال کیا جائے گا۔ تاہم، امریکی حکام نے واضح کیا ہے کہ اس ابتدائی ملاقات کے نتیجے میں فوری طور پر کسی باضابطہ معاہدے پر دستخط ہونے کی توقع نہیں ہے۔

عالمی تجزیہ کار اس مجوزہ سہ فریقی ملاقات کو 1945 میں دوسری جنگ عظیم کے خاتمے پر ہونے والی تاریخی "یالٹا کانفرنس" سے تشبیہ دے رہے ہیں، جس میں اس وقت کے امریکی صدر فرینکلن روزویلٹ، برطانوی وزیراعظم ونسٹن چرچل اور سوویت رہنما جوزف اسٹالن نے مل کر یورپ کی نئی جغرافیائی اور سیاسی حد بندیاں طے کی تھیں۔

دوسری جانب یوکرین کے صدر ولودومیر زیلنسکی نے اس متوقع ملاقات پر شدید تحفظات کا اظہار کیا ہے۔ صدر زیلنسکی نے بھی اس بیٹھک کو 1945 کی یالٹا کانفرنس سے جوڑتے ہوئے خبردار کیا کہ چین کے شہر شینزن میں ہونے والی یہ ملاقات اکیسویں صدی کے لیے یالٹا طرز پر "عالمی اثر و رسوخ کے دائروں کی نئی تقسیم" کا پیش خیمہ ثابت ہو سکتی ہے، جس کے عالمی سیاست اور چھوٹے ممالک کی خودمختاری پر گہرے اثرات مرتب ہوں گے۔