پشاور (رپورٹ: حسبان میڈیا)
گورنر خیبر پختونخوا فیصل کریم کنڈی نے پاکستان تحریک انصاف (پی ٹی آئی) کے ساتھ کسی بھی قسم کے سیاسی مذاکرات کے امکان کو یکسر مسترد کرتے ہوئے کہا ہے کہ موجودہ حالات میں پی ٹی آئی سے بات چیت کا سوال ہی پیدا نہیں ہوتا۔ پشاور میں جیو نیوز سے خصوصی گفتگو کرتے ہوئے گورنر خیبر پختونخوا نے صوبائی محکموں کی کارکردگی اور پی ٹی آئی کی اندرونی تنظیمی صورتحال پر کڑی تنقید کی اور واضح کیا کہ صوبے کے انتظامی امور میں اصلاحات کے لیے سخت اقدامات اٹھائے جا رہے ہیں۔
فیصل کریم کنڈی نے صوبائی محکموں کی ابتر صورتحال پر تشویش کا اظہار کرتے ہوئے کہا کہ "ہمیں جس محکمے کی بریفنگ دی جاتی ہے، ہم سر پکڑ لیتے ہیں"۔ انہوں نے پشاور شہر کی حالیہ صفائی مہم کا حوالہ دیتے ہوئے سوال اٹھایا کہ کیا یہ کام صوبائی حکومت پہلے نہیں کر سکتی تھی؟ انہوں نے انکشاف کیا کہ ماضی میں سرکاری ملازمین یا تو بااثر شخصیات کے گھروں پر نوکریاں کر رہے تھے یا گھر بیٹھے تنخواہیں وصول کر رہے تھے۔ گورنر نے انتباہ جاری کیا کہ اب جو بھی ملازم گھر بیٹھے تنخواہ لے گا، اسے نوکری سے فارغ کر دیا جائے گا اور صوبے میں جرم ثابت ہونے پر جزا و سزا کا سخت نظام لاگو ہوگا۔
سیاسی منظرنامے پر بات کرتے ہوئے گورنر کے پی نے پی ٹی آئی کی قیادت پر طنز کیا اور کہا کہ اس وقت تحریک انصاف کی چار مختلف فرنچائزز چل رہی ہیں جو آپس میں دست و گریبان ہیں۔ انہوں نے کہا کہ جو جماعت اپنے چیئرمین، جنرل سیکرٹری اور اسپیکر تک کو تسلیم نہیں کرتی، وہ ہمارے ساتھ کیا مذاکرات کرے گی؟ انہوں نے پی ٹی آئی کو چیلنج کیا کہ وہ پہلے عوام کو یہ بتائیں کہ ان کی اصل اوریجنل فرنچائز کون سی ہے۔ ایک اور اہم معاملے پر گفتگو کرتے ہوئے فیصل کریم کنڈی نے واضح کیا کہ سہیل آفریدی کے وارنٹ گرفتاری کے تمام قانونی تقاضے ہر صورت پورے کیے جائیں گے۔
