شانگلہ: تحصیل پورن میں تجاوزات کے خلاف آپریشن کے دوران پلازے کا چھجہ گرنے کا المناک حادثہ، 2 افراد جاں بحق اور 7 زخمی، زخمیوں کی حالت تشویشناک

شانگلہ (رپورٹ: حسبان میڈیا): صوبہ خیبر پختونخوا کے ضلع شانگلہ کی تحصیل پورن سے ایک انتہائی افسوسناک اور ہولناک واقعہ سامنے آیا ہے جہاں ضلعی انتظامیہ کی جانب سے تجاوزات کے خلاف جاری آپریشن کے دوران ایک پلازے کا چھجہ اچانک زمین بوس ہو گیا۔ اس دلخراش حادثے کے نتیجے میں ملبے تلے دب کر اور ندی میں گرنے سے 2 افراد موقع پر ہی جاں بحق ہو گئے ہیں جبکہ 7 دیگر افراد شدید زخمی ہوئے ہیں۔ واقعے کے بعد پورے علاقے میں کہرام مچ گیا اور تجارتی سرگرمیاں فوری طور پر معطل ہو گئیں۔

تفصیلات کے مطابق، حادثہ منگل کے روز الوچ بازار میں نیم کلے پل کے قریب اس وقت پیش آیا جب نور محمد پلازہ کے قریب تجاوزات کے خلاف مسماری کی کارروائی جاری تھی۔ آپریشن کے دوران بھاری مشینری کے استعمال یا تکنیکی خرابی کے باعث پلازے کا وسیع چھجہ اچانک نیچے گر گیا، جس کے اوپر اور نیچے موجود متعدد افراد ملبے سمیت گہری ندی میں جا گرے۔ حادثے کی اطلاع ملتے ہی ریسکیو 1122 کی ٹیمیں فوری طور پر جائے وقوعہ پر پہنچیں اور مقامی افراد کی مدد سے ملبے تلے دبے اور ندی میں بہہ جانے والے لوگوں کو نکالنے کے لیے امدادی کارروائیاں شروع کیں۔

میڈیکل ذرائع کے مطابق، جاں بحق ہونے والے افراد کی شناخت عباس ولد ظہور اور ارشاد احمد کے ناموں سے ہوئی ہے۔ بتایا گیا ہے کہ عباس اپنے والدین کا اکیلا بیٹا اور 4 بہنوں کا اکلوتا بھائی تھا، جس کی ناگہانی موت نے متاثرہ خاندان کو کبھی نہ بھولنے والا صدمہ پہنچایا ہے۔ ریسکیو حکام نے تمام زخمیوں کو فوری طور پر تحصیل ہیڈ کوارٹر ہسٹپال (THQ) پورن منتقل کیا، جہاں انہیں ابتدائی طبی امداد فراہم کی گئی۔ تاہم، 7 زخمیوں میں سے متعدد کی حالت انتہائی تشویشناک ہونے کے باعث انہیں مزید بہتر اور ہنگامی علاج کے لیے سیدو شریف ہسپتال سوات ریفر کر دیا گیا ہے۔ انتظامیہ نے واقعے کی تحقیقات کا حکم دے دیا ہے تاکہ حادثے کی اصل وجوہات کا تعین کیا جا سکے۔