اسلام آباد: پیٹرولیم لیوی میں کمی کے معاملے پر حکومت اور جماعت اسلامی میں ڈیڈ لاک ختم، حتمی منظوری کے لیے وزیراعظم اور امیر جماعت اسلامی کی ملاقات آج ہوگی
اسلام آباد (نمائندہ خصوصی، حسبان میڈیا): پاکستان میں مہنگائی کے مارے عوام کو پیٹرولیم مصنوعات کی قیمتوں میں بڑا ریلیف فراہم کرنے کے حوالے سے ایک انتہائی اہم اور بڑی پیش رفت سامنے آئی ہے۔ معتبر ذرائع کے مطابق، جماعت اسلامی کی مذاکراتی ٹیم اور حکومتی کمیٹیوں کے مابین پیٹرولیم لیوی میں بتدریج کمی لانے کے حتمی طریقہ کار اور فارمولے پر مکمل اتفاق رائے ہو گیا ہے، جس کے بعد پٹرول کی قیمتوں میں نمایاں کمی کی راہ ہموار ہو گئی ہے۔
ذرائع کا بتانا ہے کہ اس اہم اتفاقِ رائے کے بعد اب معاملے کو حتمی شکل دینے کے لیے آج وزیراعظم میاں محمد شہباز شریف اور امیر جماعت اسلامی پاکستان حافظ نعیم الرحمن کے درمیان ایک اہم ترین ملاقات کا قوی امکان ہے۔ وزیراعظم ہاؤس کی جانب سے جماعت اسلامی کی مرکزی مذاکراتی ٹیم کو آج ہونے والی اس اہم بیٹھک اور اس کی تیاریوں کے حوالے سے باضابطہ طور پر آگاہ کر دیا گیا ہے، جہاں دونوں رہنما طے پانے والے فارمولے کی روشنی میں معاہدے پر دستخط کریں گے۔
یاد رہے کہ جماعت اسلامی نے ملک بھر میں بڑھتی ہوئی مہنگائی، بجلی کے بلوں اور پیٹرولیم مصنوعات پر عائد بھاری ٹیکسوں و لیوی کے خلاف ایک طویل عوامی مہم اور دھرنا دے رکھا تھا۔ حکومتی اور جماعت اسلامی کی کمیٹیوں کے درمیان کئی روز سے جاری تکنیکی مذاکرات کے بعد بالآخر پیٹرولیم لیوی کو کم کرنے کے طریقہ کار پر ڈیڈ لاک ٹوٹ گیا ہے۔ مبصرین کا کہنا ہے کہ اگر آج کی ملاقات میں اس فارمولے کو حتمی سرکاری منظوری مل جاتی ہے، تو یہ جماعت اسلامی کی عوامی تحریک کی بڑی سیاسی کامیابی ہوگی اور اس سے ملک بھر کے عوام کو براہِ راست بڑا ریلیف مل سکے گا۔
