حسبان میڈیا (ویب ڈیسک): ضلع مالاکنڈ کے مرکزی شہر بٹ خیلہ میں پٹرولیم مصنوعات کی قیمتوں اور پٹرولیم لیوی کے خلاف جماعت اسلامی کا احتجاجی دھرنا جاری ہے، جس میں سیاسی کارکنوں کے علاوہ مختلف شعبہ ہائے زندگی سے تعلق رکھنے والے شہری بھی شریک ہیں۔
دھرنے کے شرکاء نے حکومت سے مطالبہ کیا ہے کہ پٹرولیم مصنوعات کی قیمتوں میں کمی کی جائے اور پٹرولیم لیوی ختم کرکے عوام کو فوری ریلیف فراہم کیا جائے۔ مظاہرین کا کہنا ہے کہ ایندھن کی قیمتوں میں اضافے کا بوجھ براہ راست عام شہریوں پر منتقل ہورہا ہے۔
شرکاء کے مطابق پٹرولیم مصنوعات مہنگی ہونے سے نہ صرف ٹرانسپورٹ کے کرائے اور اخراجات بڑھتے ہیں بلکہ اشیائے ضروریہ کی قیمتوں میں بھی اضافہ ہوتا ہے، جس سے پہلے ہی مہنگائی کا سامنا کرنے والے عوام کی مشکلات مزید بڑھ جاتی ہیں۔
جماعت اسلامی کے رہنماؤں کا کہنا ہے کہ حکومت کو محض اعلانات کے بجائے مہنگائی میں کمی اور عوام کو معاشی ریلیف دینے کے لیے عملی اقدامات کرنا ہوں گے۔ ان کا مطالبہ ہے کہ پٹرولیم لیوی واپس لینے کے ساتھ پٹرولیم مصنوعات کی قیمتیں بھی کم کی جائیں۔
جماعت اسلامی نے واضح کیا ہے کہ مطالبات تسلیم ہونے تک احتجاجی دھرنا جاری رکھا جائے گا۔ مظاہرین نے حکومت پر زور دیا کہ عوامی مشکلات کا فوری نوٹس لیتے ہوئے پٹرولیم مصنوعات کی قیمتوں میں کمی اور مہنگائی پر قابو پانے کے لیے مؤثر اقدامات کیے جائیں۔
