پشاور — خیبرپختونخوا میں رمضان پیکج کی تقسیم ابھی تک شروع نہیں ہوسکی ہے کیونکہ ڈیجیٹل طریقہ کار کی ترقی نہ ہونے کی وجہ سے پیکج پر عمل درآمد میں تاخیر ہوئی ہے۔

ذرائع کے مطابق مستحق افراد کے انتخاب اور ڈیٹا اکٹھا کرنے کا کام عوامی نمائندوں کو سونپا گیا ہے۔ عوامی نمائندے مستحق افراد کا ڈیٹا مرتب کر کے محکمہ سوشل ویلفیئر کو فراہم کریں گے جس کے بعد رمضان پیکج کی تقسیم ممکن ہو سکے گی۔ ڈیٹا اکٹھا کرنے کی وجہ سے مستحق افراد کو پیکیج وصول کرنے میں مزید کئی دن لگ سکتے ہیں۔

خیبرپختونخوا حکومت نے رمضان پیکج کے لیے کل تقریباً 13 ارب روپے مختص کیے ہیں، جس کے تحت 116394 افراد کو 12500 روپے دیے جائیں گے۔ یتیم، بیوائیں اور معذور افراد کو رمضان پیکج کا اہل قرار دیا گیا ہے جبکہ عارضی طور پر بے گھر افراد اس پیکج کے اہل نہیں ہیں۔

صوبائی سطح پر تقسیم کی تفصیلات کے مطابق پشاور میں 108,500، سوات میں 67,500، مردان میں 60,486 اور چارسدہ میں 40,000 سے زائد افراد کو رمضان پیکج دیا جائے گا۔

ڈائریکٹر سوشل ویلفیئر نے کہا کہ مستحق افراد کی نشاندہی کے لیے ڈپٹی کمشنرز کو خطوط ارسال کر دیے گئے ہیں اور امید ہے کہ چند روز میں رمضان پیکج کی تقسیم شروع ہو جائے گی۔