وینزویلا میں امریکی فوجی آپریشن اور صدر ڈونلڈ ٹرمپ کے وینزویلا کو کنٹرول میں رکھنے کے بیان پر واشنگٹن میں وائٹ ہاؤس کے باہر مظاہرہ کیا گیا۔
مظاہرین بڑی تعداد میں وائٹ ہاؤس کے باہر جمع ہوئے اور نعرے لگائے اور بینرز لہرا رہے تھے جن پر لکھا تھا 'وینزویلا کے خلاف جنگ نہیں'۔
ادھر نیویارک سٹی کے ٹائمز اسکوائر میں مظاہرین نے ریلی نکالی اور صدر ڈونلڈ ٹرمپ کی گرفتاری کا مطالبہ کیا۔
اس کے علاوہ پیرس میں بائیں بازو کے مظاہرین نے وینزویلا پر امریکی حملوں کی مذمت کی اور وینزویلا کے پرچم لہرائے۔
وینزویلا کے صدر مادورو کی گرفتاری کے خلاف یونان کے دارالحکومت ایتھنز میں ہزاروں افراد نے مارچ کیا۔
روم میں اطالوی شہریوں نے وینزویلا میں امریکی آپریشن کے خلاف احتجاج کیا اور امریکی حملے کے خلاف ارجنٹائن اور کولمبیا میں بھی مظاہرے کیے گئے۔
واضح رہے کہ فلوریڈا میں پریس کانفرنس کرتے ہوئے صدر ڈونلڈ ٹرمپ نے وینزویلا کے صدر مادورو کے خلاف مجرمانہ الزامات عائد کرنے کا اعلان کرتے ہوئے کہا تھا کہ مادورو اور ان کی اہلیہ کو نیویارک منتقل کیا جا رہا ہے، انہیں انصاف کے کٹہرے میں لایا جائے گا۔
ڈونلڈ ٹرمپ نے کہا کہ میری ہدایات پر امریکی فوج نے وینزویلا کے دارالحکومت میں غیر معمولی آپریشن کیا، امریکی فوج کی فضائی، زمینی اور سمندری طاقت کا شاندار مظاہرہ دیکھا گیا، یہ امریکی فوجی طاقت کا غیر معمولی اور شاندار مظاہرہ تھا۔
صدر ڈونلڈ ٹرمپ نے بھی ایک بیان میں کہا کہ ہم اقتدار کی منتقلی تک وینزویلا کو چلائیں گے، ہماری تیل کمپنیاں وینزویلا جائیں گی۔
