حسبان میڈیا - Hasban Media Logo
اس دور میں کوئی سیاسی انتقام نہیں ہوگا، جو افسر کام کرے گا وہی قابلِ قبول ہوگا: فیصل کریم کنڈی Home / سیاست /

اس دور میں کوئی سیاسی انتقام نہیں ہوگا، جو افسر کام کرے گا وہی قابلِ قبول ہوگا: فیصل کریم کنڈی

ایڈیٹر - 22/11/2026
اس دور میں کوئی سیاسی انتقام نہیں ہوگا، جو افسر کام کرے گا وہی قابلِ قبول ہوگا: فیصل کریم کنڈی

صوابی (حسبان میڈیا رپورٹ)

گورنر خیبرپختونخوا فیصل کریم کنڈی نے واضح کیا ہے کہ موجودہ دور میں کسی قسم کا سیاسی انتقام نہیں لیا جائے گا اور صوبے میں صرف وہی افسر قابلِ قبول ہوگا جو عوام کی خدمت اور کام کرے گا۔ انہوں نے کہا کہ حکومت شخصیات کے بجائے اداروں کو مضبوط بنانے پر یقین رکھتی ہے اور جو افسر کارکردگی نہیں دکھائے گا اسے ہرگز قبول نہیں کیا جائے گا۔

گورنر خیبرپختونخوا نے ان خیالات کا اظہار ڈسٹرکٹ ہیڈکوارٹر (ڈی ایچ کیو) ہسپتال صوابی میں 113 بستروں پر مشتمل نئے بلاک کی افتتاحی تقریب سے بطور مہمانِ خصوصی خطاب اور میڈیا سے گفتگو کرتے ہوئے کیا۔ تقریب میں مشیرِ صحت لیفٹیننٹ جنرل (ر) نگار جوہر، کمشنر مردان سید محمد علی شاہ، ڈپٹی کمشنر صوابی نصراللہ خان، ڈی پی او صوابی وقاص رفیق سمیت محکمہ صحت، ضلعی انتظامیہ کے افسران، صحافتی برادری اور عوامی عمائدین کی بڑی تعداد شریک تھی۔

تاخیر کا شکار منصوبے کی ریکارڈ مدت میں تکمیل
تقریب سے خطاب کرتے ہوئے گورنر فیصل کریم کنڈی نے بتایا کہ ڈی ایچ کیو ہسپتال صوابی کی نئی عمارت کی تعمیر کا منصوبہ 2017ء میں شروع ہوا تھا جسے 2019ء میں مکمل ہونا تھا، تاہم ہم نے ترجیحی بنیادوں پر ایک ماہ کے اندر فنڈز جاری کر کے اس عوامی منصوبے کو پایۂ تکمیل تک پہنچایا۔ انہوں نے یقین دلایا کہ صوابی کے مقامی مسائل کے حل کے لیے وہ وزیراعظم سے بات کریں گے اور صوبے میں 'اوپن ڈور پالیسی' بدستور جاری رہے گی۔

نئے صوبوں اور سیاسی مشاورت پر مؤقف
نئے صوبوں کے قیام سے متعلق ایک سوال کے جواب میں گورنر خیبرپختونخوا نے کہا کہ وزیراعظم شہباز شریف اور چیئرمین پیپلز پارٹی بلاول بھٹو زرداری کے درمیان انتہائی خوشگوار ماحول میں ملاقات ہوئی ہے اور گزشتہ روز بھی ایک بیٹھک ہوئی ہے۔ ان کا کہنا تھا کہ معاملات بہتری کی جانب گامزن ہیں، ہم ہر چیز کو آئینی تناظر میں دیکھیں گے کیونکہ مسائل میڈیا بیانات کے بجائے بیٹھ کر بات چیت سے حل ہوتے ہیں۔ انہوں نے بتایا کہ متعلقہ فورمز پر مشاورت کا آغاز ہو چکا ہے اور انشاءاللہ اس معاملے کا بہتر حل نکل آئے گا۔

شعبۂ صحت کی بہتری اور مشیرِ صحت کا خطاب
صوبے میں طبی سہولیات کا ذکر کرتے ہوئے گورنر نے کہا کہ صحت کا شعبہ حکومت کی اولین ترجیحات میں شامل ہے اور ہماری کوشش ہے کہ خیبرپختونخوا کے عوام کو علاج معالجے کے لیے دوسرے صوبوں کا رخ نہ کرنا پڑے۔ اس مقصد کے لیے نئے ہسپتالوں کی تعمیر اور موجودہ طبی مراکز میں جدید سہولیات کی فراہمی پر خصوصی توجہ دی جا رہی ہے۔ انہوں نے کہا کہ مشیرِ صحت لیفٹیننٹ جنرل (ر) نگار جوہر کا تعلق خود اسی شعبے سے ہے اور ان کی پیشہ ورانہ مہارت و تجربے سے بھرپور استفادہ کیا جائے گا۔ اس موقع پر مشیرِ صحت نگار جوہر نے ہسپتال کے نئے بلاک کو صوابی کے عوام کے لیے ایک اہم تحفہ قرار دیتے ہوئے کہا کہ اس کی تکمیل سے شہریوں کو اپنے ہی ضلع میں معیاری اور بہتر طبی سہولیات میسر آئیں گی۔