درگئی/مالاکنڈ: مالاکنڈ کی تحصیل درگئی کے علاقے شہید آباد میں اراضی کے دیرینہ تنازعے نے چار افراد کی جان لے لی ہے۔ لیویز کنٹرول روم سے جاری کردہ ابتدائی معلومات کے مطابق، شہید آباد میں دو فریقین کے مابین زمین کی ملکیت پر تلخ کلامی ہوئی، جس نے دیکھتے ہی دیکھتے مسلح تصادم کی شکل اختیار کر لی۔ مخالفین کی جانب سے کی جانے والی اندھا دھند فائرنگ کے نتیجے میں چار افراد موقع پر ہی دم توڑ گئے۔

واقعے کی اطلاع ملتے ہی ریسکیو 1122 کی میڈیکل ٹیمیں اور لیویز فورس کی بھاری نفری فوری طور پر جائے وقوعہ پر پہنچ گئی۔ تاہم، فائرنگ کی شدت کے باعث چاروں شدید زخمی افراد ہسپتال پہنچنے سے قبل ہی دم توڑ چکے تھے۔ ریسکیو اہلکاروں نے ضروری قانونی کارروائی اور پوسٹ مارٹم کے لیے لاشوں کو فوری طور پر ٹائون ہیڈ کوارٹر (THQ) ہسپتال درگئی منتقل کر دیا۔

ہسپتال انتظامیہ اور لیویز ذرائع کے مطابق، جاں بحق ہونے والے افراد کی شناخت اسد خان، ابراہیم، ولید اور سراج الحق کے ناموں سے ہوئی ہے۔ واقعے کے بعد علاقے میں شدید خوف و ہراس پھیل گیا ہے اور فضا سوگوار ہے۔ لیویز حکام کا کہنا ہے کہ ملزمان فائرنگ کے بعد جائے واردات سے فرار ہونے میں کامیاب ہو گئے، جن کی گرفتاری کے لیے علاقے کی ناکہ بندی کر کے سرچ آپریشن شروع کر دیا گیا ہے اور انہیں جلد قانون کے کٹہرے میں لایا جائے گا۔