پاک فوج کا برطانیہ میں منعقدہ عالمی عسکری مقابلے 'کیمبرین پٹرول 2026' میں شاندار مظاہرہ، سلور میڈل اپنے نام کر لیا

لندن/راولپنڈی (حسبان میڈیا  ): پاک فوج کی ٹیم نے برطانیہ کے علاقے ویلز میں منعقد ہونے والے دنیا کے مشکل ترین اور معتبر ترین بین الاقوامی فوجی پٹرولنگ مقابلے 'کیمبرین پٹرول 2026' (Cambrian Patrol 2026) میں شاندار کارکردگی کا مظاہرہ کرتے ہوئے سلور میڈل جیت لیا ہے۔

یہ مشق ویلز، برطانیہ میں 2 سے 13 اکتوبر 2026 تک منعقد ہوئی، جس میں دنیا بھر کے 36 ممالک کی 140 عسکری ٹیموں نے حصہ لیا۔ رواں سال بین الاقوامی مقابلے میں پاکستان کی نمائندگی 59 پنجاب رجمنٹ کی مایہ ناز ٹیم نے کی، جس میں ایک فوجی افسر اور 7 باصلاحیت سپاہی شامل تھے۔ پاکستانی جوانوں نے کٹھن مراحل، انتہائی نامساعد موسمی حالات اور مشکل ترین جغرافیائی خطوں میں اپنی غیر معمولی پیشہ ورانہ صلاحیتوں اور عسکری مہارت کا لوہا منواتے ہوئے یہ کامیابی حاصل کی ہے۔

سرکاری ذرائع کے مطابق، پاکستان مسلسل پانچ سال سے اس عالمی مقابلے میں تمغے حاصل کر کے ایک منفرد ریکارڈ قائم کر چکا ہے۔ پاک فوج کی ٹیموں نے اس سے قبل 2022 اور 2023 میں سلور میڈل جیتے تھے، جب کہ 2024 اور 2025 میں گولڈ میڈل حاصل کیے تھے۔ اس تاریخی ریکارڈ کے علاوہ پاک فوج کی ٹیمیں ماضی میں 2010، 2015، 2016، 2017 اور 2018 میں بھی گولڈ میڈلز اپنے نام کر چکی ہیں، جو ان کی اعلیٰ ترین تربیت کی عکاسی کرتا ہے۔

اس شاندار کامیابی کے فوراً بعد، لندن میں متعین پاکستانی ہائی کمشنر کی جانب سے سلور میڈل جیتنے والی پاک فوج کی ٹیم کے اعزاز میں ایک پروقار استقبالیہ دیا گیا، جہاں ہائی کمشنر نے جوانوں کی کارکردگی کو سراہتے ہوئے انہیں پوری قوم کا فخر قرار دیا۔