حسبان میڈیا (ویب ڈیسک): امریکی صدر ڈونلڈ ٹرمپ نے دعویٰ کیا ہے کہ امریکی بحریہ نے آبنائے ہرمز میں ایران کی جانب سے بچھائی گئی تمام بارودی سرنگیں صاف کردی ہیں اور اس اہم سمندری گزرگاہ پر اب امریکا کو مکمل بالادستی حاصل ہے۔

اوول آفس میں صحافیوں سے گفتگو کرتے ہوئے ڈونلڈ ٹرمپ نے کہا کہ آبنائے ہرمز اس وقت کھلی ہے اور وہاں امریکی بحریہ کا مکمل کنٹرول قائم ہے۔ ان کے بقول ایران ماضی میں کبھی کبھار آبنائے میں بارودی سرنگیں بچھاتا رہا ہے، تاہم امریکی بحریہ انہیں تلاش کرکے ناکارہ بناتی رہی ہے۔

امریکی صدر نے مزید دعویٰ کیا کہ آبنائے ہرمز کو مکمل طور پر بارودی سرنگوں سے پاک کردیا گیا ہے اور اس کے کسی بھی حصے میں ایران کا کنٹرول باقی نہیں رہا۔

ڈونلڈ ٹرمپ کے مطابق امریکا نے اس اہم آبی گزرگاہ پر 100 فیصد کنٹرول حاصل کرلیا ہے، تاہم ان دعوؤں کی آزاد ذرائع سے فوری طور پر تصدیق سامنے نہیں آئی۔

آبنائے ہرمز عالمی تجارت اور توانائی کی ترسیل کے لیے انتہائی اہم سمندری راستہ تصور کی جاتی ہے۔ یہ خلیج فارس کو خلیج عمان اور بحیرہ عرب سے ملاتی ہے اور دنیا کی بڑی مقدار میں تیل و گیس اسی راستے سے عالمی منڈیوں تک پہنچتی ہے۔

ماہرین کے مطابق آبنائے ہرمز میں کسی بھی قسم کی رکاوٹ یا کشیدگی عالمی سطح پر تیل اور گیس کی قیمتوں سمیت توانائی کی منڈیوں کو براہ راست متاثر کرسکتی ہے، اسی وجہ سے اس خطے میں ہونے والی ہر پیش رفت کو عالمی سطح پر غیر معمولی اہمیت دی جاتی ہے۔