حسبان میڈیا ( ویب ڈیسک): تھانہ صدر کی حدود میں گھریلو تنازعے کے دوران فائرنگ کا افسوسناک واقعہ پیش آیا، جس کے نتیجے میں ایک شخص جاں بحق ہوگیا۔
پولیس کے مطابق واقعہ میروس کلے میں پیش آیا، جہاں مبینہ طور پر محمد شیر، فضل شیر اور ایک اور فضل شیر نے فائرنگ کرکے پزیر گل کو نشانہ بنایا، جس کے نتیجے میں وہ موقع پر ہی دم توڑ گیا۔
ابتدائی پولیس تفتیش کے مطابق فائرنگ کے پیچھے خواتین سے متعلق ایک تنازعہ بتایا جا رہا ہے، تاہم پولیس حکام کا کہنا ہے کہ واقعے کی اصل وجوہات جاننے کے لیے مزید تحقیقات جاری ہیں۔
واقعے کی اطلاع ملتے ہی پولیس کی ٹیم جائے وقوعہ پر پہنچ گئی اور علاقے کو محفوظ بنانے کے بعد شواہد اکٹھے کرنا شروع کردیے۔ پولیس نے واقعے سے متعلق دیگر اہم شواہد بھی جمع کیے ہیں تاکہ فائرنگ کے محرکات اور ذمہ دار افراد کے کردار کا تعین کیا جاسکے۔
پولیس حکام کے مطابق واقعے کے تمام پہلوؤں کا باریک بینی سے جائزہ لیا جا رہا ہے، جبکہ مبینہ طور پر فائرنگ میں ملوث افراد کے خلاف قانون کے مطابق کارروائی عمل میں لائی جائے گی۔
پولیس کا کہنا ہے کہ تحقیقات مکمل ہونے کے بعد واقعے کی اصل وجہ اور فائرنگ میں ملوث افراد کے حوالے سے مزید حقائق سامنے آنے کی توقع ہے۔
