ویب ڈیسک: امریکی صدر ڈونلڈ ٹرمپ نے ایران کے خلاف مجوزہ فوجی کارروائی کو فی الحال مؤخر کرنے کا اعلان کرتے ہوئے کہا ہے کہ اگر ایران کے ساتھ جلد کسی قابلِ قبول معاہدے تک رسائی ممکن ہو گئی تو حملے کی ضرورت پیش نہیں آئے گی۔
اپنے تازہ بیان میں ڈونلڈ ٹرمپ نے کہا کہ امریکا سفارتی حل کو ترجیح دینا چاہتا ہے، تاہم یہ موقع محدود مدت کے لیے ہے۔ ان کے مطابق اگر مذاکرات تیزی سے کامیاب ہو جاتے ہیں تو فوجی کارروائی سے گریز کیا جائے گا، جبکہ اسرائیل بھی اس حکمتِ عملی پر امریکا کے ساتھ متفق ہے۔
امریکی صدر نے دعویٰ کیا کہ ایران سمیت مشرقِ وسطیٰ کے بعض ممالک نے واشنگٹن سے ممکنہ حملہ روکنے کی درخواست کی ہے۔ ان کا کہنا تھا کہ خطے میں کشیدگی کم کرنے کے لیے سنجیدہ سفارتی کوششیں جاری ہیں۔
ڈونلڈ ٹرمپ کے مطابق زیرِ غور ممکنہ معاہدے میں آبنائے ہرمز کو مستقل طور پر ہر قسم کی رکاوٹ سے پاک رکھنا اور ایران کے جوہری پروگرام سے متعلق عالمی خدشات کا مؤثر حل شامل ہوگا۔
امریکی صدر کے اس بیان کے بعد خطے میں جاری کشیدگی، ممکنہ سفارتی پیش رفت اور آئندہ امریکی حکمتِ عملی پر عالمی سطح پر نئی بحث شروع ہو گئی ہے، جبکہ مبصرین کی نظریں ایران کے ممکنہ ردِعمل اور مذاکرات کی سمت پر مرکوز ہیں۔
