نئی دہلی: بھارتی وزیر اعظم نریندر مودی نے نئی دہلی کے تاریخی مقام جنتر منتر پر کاکروچ جنتا پارٹی کے حالیہ احتجاج کے دوران نازیبا زبان استعمال کرنے والے مظاہرین کو باقاعدہ معاف کرنے کا اعلان کر دیا ہے۔ سوشل میڈیا پر جاری کردہ اپنے ایک خصوصی ویڈیو پیغام میں وزیر اعظم مودی نے مظاہرین کے خلاف عدالتوں یا قانونی کارروائی کے بجائے انہیں گلے لگانے اور سیدھی راہ دکھانے کی وکالت کی ہے۔
اپنے ویڈیو بیان میں بھارتی وزیر اعظم کا کہنا تھا کہ جنتر منتر پر جو کچھ بھی ہوا، اسے بھارت سمیت پوری دنیا نے لائیو دیکھا۔ انہوں نے افسوس کا اظہار کرتے ہوئے کہا کہ کچھ شرارتی عناصر اور بچوں کی جانب سے ایسی نازیبا زبان اور گالیاں استعمال کی گئیں جو کسی بھی مہذب معاشرے کے شایانِ شان نہیں ہیں۔ نریندر مودی نے جذباتی انداز اختیار کرتے ہوئے انکشاف کیا کہ احتجاج کے دوران نہ صرف انہیں بلکہ ان کی مرحومہ والدہ کو بھی نشانہ بنایا گیا، جو کہ انتہائی ناخوشگوار عمل تھا۔
تاہم، انہوں نے سخت قانونی چارہ جوئی کے امکان کو مسترد کرتے ہوئے کہا کہ بچپن میں انسان سے غلطیاں سرزد ہوتی ہیں اور یہ وقت ان سے سیکھنے کا ہوتا ہے۔ انہوں نے سوال اٹھایا کہ ہمارے معاشرے کی بیٹیاں اور نوجوان ایسی زبان کیسے استعمال کر سکتے ہیں؟ لیکن اس وقت سزا دینے یا انہیں عدالتوں کے چکر لگوانے سے صورتحال کو تبدیل نہیں کیا جا سکتا، بلکہ یہ گمراہ بچے ہیں جنہیں راہ دکھانا ریاست اور معاشرے کی ذمہ داری ہے۔
نریندر مودی نے مثال دیتے ہوئے واضح کیا کہ بعض اوقات بولتے ہوئے ہماری اپنی زبان دانتوں کے نیچے آ کر زخمی ہو جاتی ہے، لیکن ہم اس وجہ سے اپنے دانت نہیں توڑتے؛ یہ بچے بھی ہمارے اپنے ہیں۔ انہوں نے مظاہرین اور نوجوانوں کو مخاطب کرتے ہوئے اپیل کی کہ وہ نفرت کا راستہ چھوڑ کر ملک کی ترقی کے لیے ساتھ مل کر آگے بڑھیں، کچھ نیا سیکھیں اور اپنے خوابوں کو پورا کریں۔ انہوں نے زور دیا کہ بھارت تیزی سے آگے بڑھ رہا ہے اور وہ نوجوانوں کو بھی اس ترقی کے سفر میں شامل دیکھنا چاہتے ہیں۔
