اسلام آباد :  پاکستان میں پیٹرول اور ڈیزیل کی فی لیٹر قیمتوں پر وصول کیے جانے والے بھاری ٹیکسوں، لیوی اور مارجنز کی تفصیلات سامنے آئی ہیں۔ میڈیا رپورٹس کے مطابق حاصل ہونے والی حالیہ دستاویزات سے یہ انکشاف ہوا ہے کہ ملک میں فروخت ہونے والے فی لیٹر پیٹرول پر مجموعی طور پر 108 روپے 67 پیسے جبکہ فی لیٹر ڈیزیل پر 96 روپے 86 پیسے کے ٹیکسز اور مارجنز وصول کیے جا رہے ہیں، جس نے مہنگائی سے پریشان عوام پر بوجھ مزید بڑھا دیا ہے۔

دستاویزات کے مطابق پیٹرول کی فی لیٹر قیمت میں 80 روپے پٹرولیم لیوی اور 5 روپے کلائمیٹ لیوی کی مد میں شامل ہیں۔ اس کے علاوہ 7 روپے 16 پیسے فی لیٹر فریٹ ریٹ، 7 روپے 87 پیسے او ایم سی (OMC) کا مارجن، اور 8 روپے 64 پیسے ڈیلرز مارجن کی صورت میں وصول کیے جا رہے ہیں۔ ان تمام اضافی چارجز کو ملا کر یہ رقم 108 روپے سے تجاوز کر جاتی ہے جو براہِ راست صارف کی جیب سے ادا ہوتی ہے۔

اسی طرح ہائی اسپیڈ ڈیزیل پر بھی ٹیکسوں اور مارجنز کا بھاری بوجھ برقرار ہے۔ ڈیزیل پر فی لیٹر 70 روپے 82 پیسے پٹرولیم لیوی اور 5 روپے کلائمیٹ لیوی عائد ہے، جبکہ 4 روپے 53 پیسے فریٹ ریٹ، 7 روپے 87 پیسے او ایم سی مارجن اور 8 روپے 64 پیسے ڈیلرز مارجن بھی قیمت کا حصہ ہیں۔ عوامی اور تاجر حلقوں نے ان بھاری مارجنز اور ٹیکسز پر شدید تشویش کا اظہار کرتے ہوئے حکومت سے پیٹرولیم مصنوعات پر ٹیکسوں کی شرح کم کرنے کا مطالبہ کیا ہے۔