پشاور :  خیبر پختونخوا پولیس نے صوبے میں سیکیورٹی کی مجموعی صورتحال اور مہنگائی کے پیشِ نظر س سراغ رساں کتوں کی دیکھ بھال اور خوراک کے بجٹ میں نمایاں اضافہ کر دیا ہے۔ پولیس حکام کے مطابق، کے پی پولیس کے 'کے نائن (K9) یونٹ' کے تربیت یافتہ سراغ رساں کتے دہشت گردی کے خلاف جنگ اور مختلف حساس مقامات کی سیکیورٹی کے حوالے سے انتہائی اہم ترین کردار ادا کر رہے ہیں، جس کی وجہ سے ان کی کارکردگی اور صحت کو برقرار رکھنا ناگزیر ہے۔

پولیس ذرائع کی جانب سے فراہم کردہ معلومات کے مطابق، نئے مالی سال کے وفاقی بجٹ کے بعد بیرون ممالک سے لائے جانے والے ان مخصوص نسل کے کتوں کی خوراک، مخصوص ادویات اور دیکھ بھال کا سامان انتہائی مہنگا ہو گیا ہے، جس کے باعث کے پی پولیس کا سابقہ بجٹ شدید متاثر ہو رہا تھا۔ اس صورتحال سے نمٹنے کے لیے محکمے نے کے نائن یونٹ کے لیے اضافی اور خصوصی بجٹ مختص کیا ہے۔ مزید برآں، ان کتوں کی طبی دیکھ بھال اور باقاعدہ چیک اپ کے لیے ماہر ڈاکٹرز کی پیشہ ورانہ خدمات بھی حاصل کر لی گئی ہیں جبکہ سخت گرمی کے موسم میں ان کی کارکردگی برقرار رکھنے کے لیے ان مخصوص کھوجی کتوں کو ایئر کنڈیشنڈ کمروں میں رکھنے کے انتظامات مکمل کر لیے گئے ہیں۔