کوالالمپور: ملائیشیا کے وزیراعظم انور ابراہیم نے واضح کیا ہے کہ اگر ملک میں کوئی اسرائیلی شہری موجود پایا گیا تو اسے فوری طور پر ملک سے نکال دیا جائے گا۔ ان کا کہنا ہے کہ ملائیشیا اسرائیل کو تسلیم نہیں کرتا اور اس پالیسی میں کوئی تبدیلی نہیں کی گئی۔
وزیراعظم انور ابراہیم کے مطابق جنوبی ریاست جوہر میں ایک نجی رہائشی کمیونٹی کی سرگرمیوں میں مبینہ طور پر اسرائیلی شہریوں کی شرکت سے متعلق الزامات سامنے آئے ہیں، جن کی تحقیقات متعلقہ اداروں کی جانب سے کی جا رہی ہیں۔
انہوں نے کہا کہ حکومت اس معاملے کو سنجیدگی سے دیکھ رہی ہے اور اگر تحقیقات کے دوران الزامات درست ثابت ہوئے تو کسی بھی قسم کی رعایت نہیں دی جائے گی۔
انور ابراہیم کا کہنا تھا کہ اگر تحقیقات میں کوئی اسرائیلی شہری موجود پایا گیا تو اسے فوری طور پر ملک بدر کرنے کا فیصلہ کیا جائے گا، کیونکہ ملائیشیا اسرائیل کو تسلیم نہیں کرتا۔
رپورٹس کے مطابق اسرائیلی پاسپورٹ رکھنے والے افراد کے لیے ملائیشیا میں داخلے کے قوانین سخت ہیں، کیونکہ دونوں ممالک کے درمیان سفارتی تعلقات موجود نہیں۔ تاہم خصوصی حالات میں حکومتی اجازت کے ذریعے محدود استثنیٰ دیا جا سکتا ہے۔
یہ معاملہ اس وقت سامنے آیا جب ریاست جوہر کی حکومت نے ایک اسٹارٹ اپ کمیونٹی "نیٹ ورک اسکول" سے متعلق بعض الزامات پر وفاقی حکومت سے تحقیقات کا مطالبہ کیا۔ اس کے بعد وزارت داخلہ نے معاملے کی باقاعدہ چھان بین شروع کر دی۔
حکام کے مطابق تحقیقات مکمل ہونے کے بعد ہی مزید اقدامات کا فیصلہ کیا جائے گا، تاہم وزیراعظم نے واضح کیا ہے کہ قومی پالیسی اور ملکی قوانین پر کوئی سمجھوتہ نہیں کیا جائے گا۔
