اسلام آباد: پاکستان ٹیلی کمیونیکیشن اتھارٹی کے چیئرمین نے انکشاف کیا ہے کہ ملک بھر میں ادارے کی تقریباً نو ہزار سائٹس پر چوری کی وارداتیں رپورٹ ہو چکی ہیں، جس کے باعث ٹیلی کمیونیکیشن سروسز کے معیار کو متاثر ہونے کا سامنا کرنا پڑا۔
چیئرمین پی ٹی اے کے مطابق حکومت کی جانب سے صارفین کے مفادات کے تحفظ کے لیے ہدایات دی جاتی ہیں کہ اگر کسی شہری نے کوئی پیکج خریدا ہو اور سروس بند ہونے یا متاثر ہونے کے باعث وہ اسے استعمال نہ کر سکے تو متعلقہ رقم واپس کی جائے۔
انہوں نے بتایا کہ موبائل سروسز کے معیار کو بہتر بنانے کے لیے پی ٹی اے نے مختلف کمپنیوں پر چار ارب روپے کے جرمانے بھی عائد کیے ہیں، تاکہ صارفین کو بہتر سہولیات فراہم کی جا سکیں۔
پی ٹی اے چیئرمین نے واضح کیا کہ موبائل فونز پر عائد کیے جانے والے ٹیکسز کے معاملے میں ادارے کا کوئی اختیار نہیں۔ ان کا کہنا تھا کہ موبائل فون پر ٹیکس لگانے یا اس میں تبدیلی کا فیصلہ فیڈرل بورڈ آف ریونیو کے دائرہ اختیار میں آتا ہے۔
انہوں نے مزید کہا کہ ٹیلی کمیونیکیشن کے شعبے میں سروس کے معیار، صارفین کی شکایات اور نیٹ ورک کی بہتری کے لیے اقدامات جاری ہیں، جبکہ چوری کی وارداتوں کے باعث متاثر ہونے والے انفراسٹرکچر کے تحفظ کے لیے بھی متعلقہ اداروں کے ساتھ کام کیا جا رہا ہے۔
