کراچی/اسلام آباد :  محکمہ موسمیات نے ملک بھر میں موسم کی بدلتی صورتحال کے پیش نظر شہریوں کو آئندہ چند روز کے دوران تیز ہواؤں اور بارشوں کے حوالے سے محتاط رہنے کی خصوصی ہدایت جاری کی ہے۔ ملک کے مختلف حصوں میں گرمی، شدید حبس اور بعض مقامات پر گرج چمک کے ساتھ بارش کا ملا جلا رجحان دیکھا جا رہا ہے۔

صوبائی دارالحکومت کراچی میں حبس کی شدت برقرار ہے جہاں موجودہ درجہ حرارت 30 ڈگری سینٹی گریڈ ریکارڈ کیا گیا ہے، جبکہ دن کے اوقات میں پارہ 33 سے 35 ڈگری سینٹی گریڈ تک جانے کا امکان ظاہر کیا گیا ہے۔ موسمیاتی ریکارڈ کے مطابق شہرِ قائد میں ہوا میں نمی کا تناسب 75 فیصد تک پہنچ چکا ہے، جس کے باعث گرمی کی شدت زیادہ محسوس ہو رہی ہے، تاہم جنوب مغربی سمت سے 18 کلومیٹر فی گھنٹہ کی رفتار سے چلنے والی ہوائیں شہریوں کو کچھ ریلیف فراہم کر رہی ہیں۔

دوسری جانب وفاقی دارالحکومت اسلام آباد اور گردونواح میں آج موسم شدید گرم اور انتہائی حبس زدہ رہنے کی توقع ہے۔ محکمہ موسمیات کے مطابق جڑواں شہروں میں ہوا کی رفتار تقریباً 7 کلومیٹر فی گھنٹہ انتہائی سست رہے گی جبکہ زیادہ سے زیادہ درجہ حرارت 38 ڈگری سینٹی گریڈ تک پہنچنے کا امکان ہے۔ تاہم، صبح اور شام کے اوقات میں مطلع جزوی طور پر ابر آلود رہنے کی پیشگوئی کی گئی ہے۔ بالائی علاقوں کے حوالے سے جاری کردہ رپورٹ میں بتایا گیا ہے کہ کشمیر اور بالائی خیبرپختونخوا میں دن کے اوقات میں تیز ہواؤں اور گرج چمک کے ساتھ بارش متوقع ہے، جبکہ گلگت بلتستان میں بھی مطلع جزوی طور پر ابر آلود رہنے کے ساتھ بعض مقامات پر بونداباندی اور بارش کا امکان ہے۔