ریاض: عالمی توانائی کی مارکیٹ میں بڑا اقدام، سعودی عرب کا ایشیائی ممالک کے لیے خام تیل کی قیمتوں میں ریکارڈ کمی کا اعلان

عالمی سطح پر تیل سپلائی کرنے والے دنیا کے سب سے بڑے ملک سعودی عرب نے ایشیائی ممالک کے لیے اپنے خام تیل کی قیمتوں میں غیر معمولی اور تاریخی کمی کا اعلان کر دیا ہے۔ بین الاقوامی معاشی جریدے 'بلومبرگ' کی جانب سے جاری کردہ حالیہ رپورٹ کے مطابق، سعودی عرب کی سرکاری تیل کمپنی "سعودی آرامکو" آئندہ ماہ سے ایشیا کو برآمد کیے جانے والے اپنے فلیگ شپ 'عرب لائٹ کرود آئل' (Arab Light Crude Oil) کی قیمت میں 11 ڈالر فی بیرل کی بڑی کٹوتی کرے گی۔ اس انقلابی فیصلے کے بعد سعودی خام تیل اب علاقائی معیار (Regional Benchmark) سے 1.50 ڈالر فی بیرل کی خصوصی رعایت پر دستیاب ہوگا۔

معاشی ماہرین اور توانائی کے تجزیہ کاروں کے مطابق، سعودی آرامکو کا یہ اقدام عالمی مارکیٹ کی توقعات سے کہیں زیادہ بڑا ہے۔ بلومبرگ کی جانب سے اس سے قبل کیے گئے ایک سروے میں ماہرین نے اندازہ لگایا تھا کہ خام تیل کی قیمتوں میں زیادہ سے زیادہ 8 ڈالر فی بیرل تک کی کمی کی جا سکتی ہے، تاہم 11 ڈالر کی یہ کٹوتی مارکیٹ کی تمام پیشگوئیوں کو پیچھے چھوڑ گئی ہے۔ اس فیصلے کے بعد عالمی منڈی میں خام تیل کی قیمتوں کے مجموعی رجحان اور مسابقت پر گہرے اثرات مرتب ہونے کا امکان ہے، جبکہ ایشیائی درآمد کنندگان کو بڑے پیمانے پر مالی ریلیف حاصل ہوگا۔