تہران: ایران کے صدر مسعود پزشکیان نے امریکا کے ساتھ تعلقات اور حالیہ مفاہمتی عمل کے حوالے سے واضح مؤقف اختیار کرتے ہوئے کہا ہے کہ کسی بھی معاہدے کی کامیابی دونوں فریقوں کی ذمہ داریوں کی ادائیگی سے مشروط ہوتی ہے۔
سماجی رابطے کے پلیٹ فارم پر جاری اپنے بیان میں صدر مسعود پزشکیان نے کہا کہ اگر امریکا مفاہمتی یادداشت کے تحت اپنے وعدوں پر عمل کرے گا تو ایران بھی اپنی تمام ذمہ داریاں پوری کرے گا، کیونکہ مفاہمت کا عمل باہمی اعتماد اور دوطرفہ تعاون پر قائم ہوتا ہے۔
انہوں نے کہا کہ ایران غیر ضروری بیانات، دھمکیوں یا طاقت کے اظہار سے متاثر ہونے والا نہیں، بلکہ اس کی پالیسی ہمیشہ تدبر، دانش اور انسانی وقار پر مبنی رہی ہے۔
ایرانی صدر کے مطابق اہم فیصلے عقل و حکمت کو سامنے رکھ کر کیے جانے چاہییں، جبکہ قومی مفادات اور خودمختاری کے تحفظ کے معاملے میں ایران پوری ثابت قدمی اور جرات کے ساتھ اپنا دفاع کرے گا۔
مسعود پزشکیان نے اس بات پر بھی زور دیا کہ تہران کشیدگی کے بجائے ذمہ دارانہ طرزِ عمل کو ترجیح دیتا ہے، تاہم اگر اپنے حقوق اور مفادات کے تحفظ کی ضرورت پیش آئی تو ایران کسی دباؤ یا دھمکی کے سامنے جھکنے کے بجائے مؤثر اور فیصلہ کن انداز میں اپنا مؤقف اختیار کرے گا۔
ایرانی صدر کا یہ بیان ایسے وقت میں سامنے آیا ہے جب ایران اور امریکا کے درمیان حالیہ مفاہمتی عمل اور اس پر عمل درآمد کے حوالے سے مختلف سفارتی حلقوں میں مسلسل گفتگو جاری ہے۔
