واشنگٹن: امریکی صدر ڈونلڈ ٹرمپ نے کہا ہے کہ امریکی افواج نے ایران کے متعدد فوجی اہداف کو نشانہ بنایا ہے اور اگر حالات مزید خراب ہوئے تو امریکا مزید اقدامات سے بھی گریز نہیں کرے گا۔
سماجی رابطے کے اپنے پلیٹ فارم پر جاری بیان میں ڈونلڈ ٹرمپ نے دعویٰ کیا کہ امریکی طیاروں نے ایران کے میزائل اور ڈرون ذخائر، ساحلی نگرانی کے مراکز اور دیگر عسکری تنصیبات پر کارروائیاں کی ہیں۔
امریکی صدر نے اپنے پیغام میں کہا کہ بعض اوقات تحمل کی ایک حد ہوتی ہے اور اگر ضرورت پڑی تو امریکا اپنی شروع کی گئی فوجی کارروائی کو مزید آگے بڑھا سکتا ہے۔ انہوں نے ایران کے حوالے سے سخت الفاظ استعمال کرتے ہوئے مستقبل میں مزید اقدامات کا بھی عندیہ دیا۔
اس سے قبل امریکی مرکزی فوجی کمان کی جانب سے بھی ایک بیان جاری کیا گیا تھا جس میں کہا گیا کہ امریکی افواج نے ایران کی مبینہ سرگرمیوں اور آبنائے ہرمز میں تجارتی جہازوں کو لاحق خطرات کے جواب میں مختلف فوجی اہداف کو نشانہ بنایا۔
امریکی حکام کے مطابق ان کارروائیوں میں فوجی نگرانی کے نظام، مواصلاتی ڈھانچے، فضائی دفاعی مراکز، ڈرون ذخیرہ گاہوں اور دیگر عسکری تنصیبات کو ہدف بنایا گیا۔
دوسری جانب ایران نے ان حملوں کو اپنی خودمختاری کے خلاف اقدام قرار دیتے ہوئے سخت ردعمل کا عندیہ دیا ہے، جس کے بعد خطے میں کشیدگی مزید بڑھنے کے خدشات پیدا ہو گئے ہیں۔
سیاسی مبصرین کے مطابق امریکا اور ایران کے درمیان بڑھتی ہوئی محاذ آرائی نہ صرف مشرقِ وسطیٰ بلکہ عالمی توانائی اور بحری تجارت کے لیے بھی نئے خطرات پیدا کر سکتی ہے۔
