تہران: ایران نے امریکا پر دوطرفہ مفاہمتی سمجھوتے کی خلاف ورزی کا الزام عائد کرتے ہوئے کہا ہے کہ ایرانی ساحلی نگرانی کے مراکز کو نشانہ بنانا بین الاقوامی ذمہ داریوں اور طے شدہ اصولوں کے منافی اقدام ہے۔
ایرانی وزارت خارجہ کی جانب سے جاری بیان میں کہا گیا ہے کہ حالیہ امریکی کارروائیاں دونوں ممالک کے درمیان موجود مفاہمتی انتظامات سے متصادم ہیں اور ساحلی نگرانی کی تنصیبات پر حملے قابلِ مذمت ہیں۔
بیان کے مطابق ایران نے امریکی حملوں کے جواب میں اپنے دفاع کے حق کو استعمال کرتے ہوئے ان مقامات کو نشانہ بنایا جنہیں امریکا سے وابستہ قرار دیا گیا۔ وزارت خارجہ کا کہنا ہے کہ یہ اقدامات دفاعی نوعیت کے تھے اور ملکی سلامتی کے تحفظ کے لیے کیے گئے۔
ایرانی حکام نے خلیج کے جنوبی ساحل پر واقع ممالک کو بھی متنبہ کیا ہے کہ وہ اپنی سرزمین یا تنصیبات کو ایران کے خلاف کسی بھی ممکنہ کارروائی کے لیے استعمال ہونے سے روکیں۔
وزارت خارجہ کے مطابق خطے کے ممالک کو ایسی کسی سرگرمی سے گریز کرنا چاہیے جو کشیدگی میں اضافے یا علاقائی سلامتی کو نقصان پہنچانے کا باعث بنے۔
ایرانی بیان میں کہا گیا ہے کہ تہران خطے میں استحکام اور امن کا خواہاں ہے، تاہم قومی سلامتی اور خودمختاری کے خلاف کسی بھی اقدام کا مناسب جواب دیا جائے گا۔
سیاسی مبصرین کے مطابق ایرانی مؤقف سے ظاہر ہوتا ہے کہ حالیہ واقعات کے بعد خطے میں کشیدگی ایک بار پھر بڑھ سکتی ہے، جبکہ خلیجی ممالک کی سفارتی اور سیکیورٹی پالیسیوں پر بھی اس کے اثرات مرتب ہونے کا امکان ہے۔
