شاور: خیبر پختونخوا کے ضلع بنوں میں سڑک کنارے نصب بارودی مواد کے دو پے در پے دھماکوں نے علاقے میں خوف و ہراس پھیلا دیا۔ افسوسناک واقعات میں مجموعی طور پر سات افراد جان کی بازی ہار گئے جبکہ تین افراد زخمی ہوئے ہیں۔

پولیس حکام کے مطابق پہلا دھماکا بنوں کے علاقے مرکہ بیرا میں اس وقت ہوا جب ایک مسافر وین سڑک سے گزر رہی تھی۔ دھماکے کے نتیجے میں وین میں سوار پانچ افراد موقع پر ہی جاں بحق ہو گئے۔

ضلعی پولیس سربراہ یاسر آفریدی کے مطابق ابتدائی دھماکے کے بعد جب مقامی افراد اور امدادی کارکن متاثرین کی مدد کے لیے موقع پر پہنچے تو کچھ دیر بعد دوسرا دھماکا بھی ہو گیا۔ اس دھماکے کی زد میں آ کر دو افراد جان سے ہاتھ دھو بیٹھے۔

حکام کا کہنا ہے کہ دوسرے دھماکے سے ایک گاڑی بھی متاثر ہوئی جبکہ زخمی افراد کو فوری طور پر قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔

پولیس کے مطابق متاثرہ مسافر وین گاؤں ہاتھی خیل سے بنوں شہر کی جانب آ رہی تھی کہ راستے میں بارودی مواد کے دھماکے کا نشانہ بن گئی۔

قانون نافذ کرنے والے اداروں نے علاقے کو گھیرے میں لے کر شواہد جمع کرنا شروع کر دیے ہیں جبکہ واقعے کی مختلف پہلوؤں سے تحقیقات جاری ہیں۔