اسلام آباد: پاکستان پیپلز پارٹی نے وفاقی بجٹ میں سرکاری ملازمین کی تنخواہوں میں کیے گئے اضافے کو ناکافی قرار دیتے ہوئے حکومت سے مطالبہ کیا ہے کہ اسے بڑھا کر 10 فیصد کیا جائے۔

قومی اسمبلی کے اجلاس میں اظہارِ خیال کرتے ہوئے راجہ پرویز اشرف نے کہا کہ بجٹ کے اثرات سب سے پہلے سرکاری ملازمین، پنشنرز اور زرعی شعبے سے وابستہ افراد پر مرتب ہوتے ہیں، جو پہلے ہی معاشی دباؤ اور بڑھتی ہوئی مہنگائی کا سامنا کر رہے ہیں۔

انہوں نے کہا کہ کاروباری طبقہ بھی مختلف مشکلات سے دوچار رہتا ہے، تاہم اسے اپنی مصنوعات اور خدمات کی قیمتوں میں اضافے کا موقع مل جاتا ہے، جس کا بوجھ بالآخر عام صارفین کو برداشت کرنا پڑتا ہے۔

راجہ پرویز اشرف کا کہنا تھا کہ موجودہ بجٹ میں سرکاری ملازمین کی تنخواہوں میں 7 فیصد اضافہ مہنگائی کے تناسب سے ناکافی ہے۔ ان کے مطابق عوامی ریلیف کے لیے اس شرح پر نظرثانی کی جانی چاہیے۔

انہوں نے یاد دلایا کہ ماضی میں پاکستان پیپلز پارٹی کی حکومت نے سرکاری ملازمین اور پنشنرز کو نمایاں مالی ریلیف فراہم کیا تھا اور بعض مواقع پر تنخواہوں اور پنشن میں 100 فیصد تک اضافہ بھی کیا گیا۔

سابق وزیراعظم نے حکومت سے مطالبہ کیا کہ سرکاری ملازمین کی مشکلات کو مدنظر رکھتے ہوئے تنخواہوں میں اضافے کی شرح 7 فیصد سے بڑھا کر کم از کم 10 فیصد کی جائے تاکہ انہیں مہنگائی کے اثرات سے کچھ حد تک تحفظ فراہم کیا جا سکے۔

انہوں نے اس بات پر زور دیا کہ معاشی استحکام کے ساتھ ساتھ متوسط اور تنخواہ دار طبقے کو ریلیف دینا بھی حکومت کی اہم ذمہ داری ہے۔