واشنگٹن: امریکی سینیٹ میں ڈیموکریٹک قیادت کے سربراہ چک شومر نے ایران کو ممکنہ مالی مراعات یا فنڈز کی فراہمی کی سخت مخالفت کرتے ہوئے واضح کیا ہے کہ ان کی جماعت اس مقصد کے لیے کسی قسم کی حمایت فراہم نہیں کرے گی۔

اپنے ایک بیان میں چک شومر نے کہا کہ اگر صدر ڈونلڈ ٹرمپ ایران کو 300 ارب ڈالر فراہم کرنے کے خواہاں ہیں تو انہیں اس منصوبے کے لیے اپنی جماعت کی حمایت اور ووٹوں پر انحصار کرنا ہوگا، کیونکہ ڈیموکریٹس اس اقدام کا حصہ نہیں بنیں گے۔

انہوں نے دوٹوک انداز میں کہا کہ ڈیموکریٹک ارکان ایران کو اتنی بڑی مالی رقم منتقل کرنے کے کسی منصوبے کی تائید نہیں کریں گے اور نہ ہی اس کی منظوری کے لیے تعاون فراہم کریں گے۔

چک شومر نے صدر ڈونلڈ ٹرمپ کی پالیسیوں پر تنقید کرتے ہوئے کہا کہ موجودہ انتظامیہ کے فیصلوں نے امریکا کو بہتر بنانے کے بجائے مزید مشکلات سے دوچار کیا ہے۔

انہوں نے الزام عائد کیا کہ صدر کی ناقص حکمت عملی، ذاتی انا اور زمینی حقائق کو تسلیم نہ کرنے کی روش نے ملک کے سیاسی اور سفارتی معاملات کو متاثر کیا ہے۔

ڈیموکریٹک رہنما کے اس بیان کو ایران سے متعلق امریکی پالیسی پر بڑھتے ہوئے سیاسی اختلافات کا مظہر قرار دیا جا رہا ہے، جہاں مجوزہ مالی اقدامات اور تہران کے ساتھ تعلقات کے مستقبل پر دونوں بڑی جماعتوں کے درمیان واضح اختلافات سامنے آ رہے ہیں۔