واشنگٹن: امریکی صدر ڈونلڈ ٹرمپ نے ایران کے ساتھ حالیہ کشیدگی کے دوران چین اور روس کے کردار کو مثبت قرار دیتے ہوئے کہا ہے کہ دونوں طاقتوں نے براہِ راست مداخلت سے گریز کیا، جس کے باعث صورتحال مزید پیچیدہ ہونے سے بچ گئی۔
بین الاقوامی ذرائع ابلاغ کے مطابق ڈونلڈ ٹرمپ نے اپنے بیان میں کہا کہ چینی صدر شی جن پنگ اور روسی صدر ولادیمیر پیوٹن نے تنازع کے دوران ایسا کوئی عملی قدم نہیں اٹھایا جس سے خطے میں کشیدگی میں اضافہ ہوتا۔ ان کے بقول یہ طرزِ عمل قابلِ ستائش ہے اور اس سے سفارتی کوششوں کو آگے بڑھانے میں مدد ملی۔
امریکی صدر نے کہا کہ اگر چین یا روس ایران کو براہِ راست عسکری معاونت فراہم کرتے تو مشرقِ وسطیٰ کی صورتحال کہیں زیادہ خطرناک شکل اختیار کر سکتی تھی، تاہم دونوں ممالک نے ایسا کرنے سے اجتناب کیا، جس پر وہ ان کے شکر گزار ہیں۔
ڈونلڈ ٹرمپ نے اپنے بیان میں بعض روایتی اتحادی ممالک پر بھی عدم اطمینان کا اظہار کیا۔ انہوں نے کہا کہ یورپی ممالک اور جاپان نے آبنائے ہرمز میں بحری آمدورفت کی بحالی اور خطے میں استحکام کے لیے امریکا کی توقعات کے مطابق کردار ادا نہیں کیا۔
تجزیہ کاروں کے مطابق امریکی صدر کا یہ بیان اس لیے بھی اہمیت رکھتا ہے کیونکہ چین اور روس کو طویل عرصے سے ایران کے قریبی سفارتی اور اقتصادی شراکت داروں میں شمار کیا جاتا ہے۔
اگرچہ تنازع کے دوران بیجنگ اور ماسکو نے مسلسل مذاکرات، تحمل اور سفارتی حل کی حمایت کی، تاہم دونوں ممالک نے براہِ راست فوجی مداخلت سے گریز کیا اور کشیدگی کم کرنے پر زور دیتے رہے۔
دوسری جانب چین نے مختلف مواقع پر ایران پر امریکی حملوں کی مذمت کرتے ہوئے مسائل کے پرامن حل اور سفارت کاری کی ضرورت پر زور دیا، جبکہ روس نے خبردار کیا تھا کہ جنگ میں مزید وسعت پورے مشرقِ وسطیٰ میں عدم استحکام پیدا کرنے کے ساتھ ساتھ جوہری ہتھیاروں کی نئی دوڑ کو بھی جنم دے سکتی ہے۔
