واشنگٹن: امریکی صدر ڈونلڈ ٹرمپ نے کہا ہے کہ خلیج کے خطے میں امریکی فوجی موجودگی فی الحال برقرار رہے گی، جبکہ ایران کے ساتھ جامع معاہدے کے لیے طے کی گئی 60 روزہ مدت کو حتمی یا ناقابلِ توسیع ڈیڈ لائن نہیں سمجھا جانا چاہیے۔

میڈیا سے گفتگو کرتے ہوئے ڈونلڈ ٹرمپ نے کہا کہ اگر ایران تعمیری اور مثبت رویہ اختیار کرتا ہے تو دونوں ممالک کے تعلقات میں نمایاں بہتری کے امکانات موجود ہیں۔ ان کا کہنا تھا کہ ایسے ماحول میں نہ صرف پابندیوں میں نرمی کی پیش رفت ممکن ہوگی بلکہ ایران کو 300 ارب ڈالر تک کے مالی فوائد بھی حاصل ہو سکتے ہیں۔

امریکی صدر نے کہا کہ امریکا کے پاس ایران کے اربوں ڈالر مالیت کے منجمد اثاثے موجود ہیں، جو بنیادی طور پر ایران کی ملکیت ہیں۔ ان کے بقول مناسب وقت پر یہ رقم ایران کو واپس کرنا ہوگی کیونکہ عالمی مالیاتی نظام میں اعتماد برقرار رکھنے کے لیے ایسی ذمہ داریوں کی پاسداری ضروری ہے۔

ڈونلڈ ٹرمپ نے کہا کہ اگر امریکا ایران کے منجمد اثاثے واپس نہ کرے تو عالمی سرمایہ کاروں کے لیے ڈالر پر اعتماد قائم رکھنا مشکل ہو سکتا ہے، جس کے اثرات بین الاقوامی مالیاتی منڈیوں پر بھی مرتب ہو سکتے ہیں۔

انہوں نے مزید دعویٰ کیا کہ ایران اس بات پر آمادگی ظاہر کر چکا ہے کہ وہ جوہری ہتھیار نہ تیار کرے گا اور نہ ہی اس کے حصول کی کوشش کرے گا۔ امریکی صدر کے مطابق ایران کے جوہری پروگرام، ذخائر اور دیگر تکنیکی معاملات پر تفصیلی مذاکرات بھی جلد شروع ہونے کی توقع ہے۔

ڈونلڈ ٹرمپ کا کہنا تھا کہ ایران کے ساتھ زیرِ غور مجوزہ معاہدے کے حوالے سے اسرائیلی قیادت اطمینان کا اظہار کر رہی ہے اور اسرائیلی رہنما اس پیش رفت کو مثبت انداز میں دیکھ رہے ہیں۔