عالمی امن کا مرکز پاکستان: جنیوا میں امریکہ اور ایران کے تاریخی معاہدے کی تقریب کی میزبانی پاکستان کرے گا، وزیراعظم کا قومی اسمبلی میں اعلان

اسلام آباد : بین الاقوامی سفارت کاری کے میدان میں پاکستان نے ایک بار پھر عالمی سطح پر اپنا لوہا منوا لیا ہے۔ وزیراعظم محمد شہباز شریف نے قومی اسمبلی کے معزز ایوان میں اظہارِ خیال کرتے ہوئے اعلان کیا ہے کہ جنیوا میں امریکہ اور ایران کے درمیان طے پانے والے تاریخی امن معاہدے کی باضابطہ تقریب کی میزبانی پاکستان کے سپرد کر دی گئی ہے۔ انہوں نے اس عظیم کامیابی پر پاکستان سمیت پوری عالمی برادری کو مبارکباد پیش کی۔

قومی اسمبلی کے اجلاس سے خطاب کرتے ہوئے وزیراعظم شہباز شریف کا کہنا تھا کہ "جنگ کی تاریک رات کے بعد بالآخر امن کا سورج طلوع ہو گیا ہے۔" انہوں نے تصدیق کی کہ امریکہ اور ایران نے تمام محاذوں پر فوجی کارروائیوں کے مستقل اور فوری خاتمے کا اعلان کر دیا ہے اور دونوں فریقین نے مشکل ترین حالات میں بھی صبر، تحمل اور دانشمندی کا دامن ہاتھ سے نہیں چھوڑا۔ وزیراعظم نے اس کامیابی کو محض دو ممالک کا معاہدہ نہیں بلکہ امن، مکالمے اور سفارت کاری کی تاریخی فتح اور جنگ کی تباہی کا خاتمہ قرار دیا۔

وزیراعظم نے اپنے خطاب میں مسلم لیگ (ن) کے قائد میاں محمد نواز شریف کا خصوصی شکریہ ادا کیا جن کی رہنمائی انہیں ہر وقت میسر رہی۔ اس کے ساتھ ہی انہوں نے صدرِ مملکت آصف علی زرداری، چیئرمین پیپلز پارٹی بلاول بھٹو زرداری اور اتحادی جماعتوں کے تمام سربراہان کو اس تاریخی موقع پر مبارکباد دی۔

عالمی قیادت کا شکریہ ادا کرتے ہوئے وزیراعظم شہباز شریف نے امریکی صدر ڈونلڈ ٹرمپ، ایران کے سپریم لیڈر آیت اللہ مجتبیٰ خامنہ ای، ایرانی صدر اور دونوں ممالک کی مذاکراتی ٹیموں کو تزویراتی تدبر اور صبر کا مظاہرہ کرنے پر ہدیہ تبریک پیش کیا۔ انہوں نے مذاکرات کے اس کٹھن اور صبر آزما عمل میں قطر کے امیر کے بھرپور تعاون اور مثبت کردار کو زبردست الفاظ میں خراجِ تحسین پیش کیا۔ مزید برآں، وزیراعظم نے سعودی ولی عہد محمد بن سلمان اور ترکیہ کے صدر کی دور اندیش قیادت اور غیر مشروط تعاون پر بھی دلی شکریہ ادا کیا۔