منتخب نمائندوں کا راستہ روکنا جمہوریت کا گلا گھونٹنا ہے، وفاقی حکومت عوامی مینڈیٹ سے خوفزدہ ہے: وزیر اعلیٰ سہیل آفریدی

اسلام آباد / پشاور: وزیر اعلیٰ خیبرپختونخوا سہیل آفریدی کی قیادت میں وفاقی دارالحکومت جانے والے پارلیمنٹرینز کے قافلے کو اسلام آباد میں روک دیا گیا ہے، جس پر صوبائی حکومت اور پاکستان تحریک انصاف کی جانب سے شدید ردعمل کا اظہار کیا جا رہا ہے۔ اس موقع پر وفاقی حکومت کی پالیسیوں پر کڑی تنقید کرتے ہوئے وزیر اعلیٰ نے اسے جمہوری اقدار کے منافی قرار دیا۔

وزیر اعلیٰ سہیل آفریدی کا کہنا تھا کہ ہم بانی چیئرمین عمران خان سے ملاقات نہ کرانے کے خلاف پرامن احتجاج ریکارڈ کرانے جا رہے تھے، لیکن وفاقی انتظامیہ نے فسطائیت کا مظاہرہ کرتے ہوئے منتخب عوامی نمائندوں کا راستہ روک کر آئین پامال کیا ہے۔ انہوں نے واضح کیا کہ خیبرپختونخوا کے عوام نے اپنا مینڈیٹ عمران خان کے نام پر دیا ہے، اس لیے بجٹ اور اہم قومی امور پر بانی چیئرمین سے مشاورت کرنا ہمارا جمہوری، سیاسی اور اخلاقی حق بھی ہے اور فرض بھی۔

صوبائی قائد نے وفاقی حکومت کو ہدفِ تنقید بناتے ہوئے مزید کہا کہ وفاق جان بوجھ کر بانی پی ٹی آئی اور پارٹی رہنماؤں کی ملاقاتوں میں رکاوٹیں کھڑی کر رہا ہے، جو اس بات کا ثبوت ہے کہ موجودہ حکمران عوامی مینڈیٹ اور آئین سے خوفزدہ ہیں۔ انہوں نے یاد دلایا کہ جمہوری حکومتیں ہمیشہ اختلافِ رائے سنتی ہیں جبکہ فسطائی حکومتیں راستے بند کرتی ہیں۔ اگر منتخب نمائندوں کو ہی اظہارِ رائے اور پرامن احتجاج کی آزادی حاصل نہیں، تو عام شہریوں کے بنیادی حقوق کا تحفظ کیسے ممکن ہوگا۔