بحیرۂ عمان میں ایک آئل ٹینکر کو نشانہ بنائے جانے کے واقعے کے بعد 3 بھارتی شہریوں کی ہلاکت کی تصدیق سامنے آگئی، جبکہ اس واقعے پر بھارت اور امریکا کے درمیان سفارتی کشیدگی بھی بڑھ گئی ہے۔

رپورٹس کے مطابق امریکی فوج نے آبنائے ہرمز کے اطراف سکیورٹی نگرانی کے دوران ایک آئل ٹینکر کے خلاف کارروائی کی۔ امریکی سینٹرل کمانڈ کے مطابق جہاز کے عملے کو متعدد بار ہدایات دی گئیں، تاہم مطلوبہ ردعمل نہ ملنے پر جہاز کے انجن والے حصے کو نشانہ بنایا گیا۔

بھارتی میڈیا کا کہنا ہے کہ متاثرہ جہاز پر 28 افراد سوار تھے جن میں 24 بھارتی شہری شامل تھے۔ حملے کے بعد لاپتا ہونے والے 3 بھارتیوں کے بارے میں اب تصدیق کی گئی ہے کہ وہ جان کی بازی ہار چکے ہیں۔

دوسری جانب نئی دہلی نے واقعے پر سخت ردعمل ظاہر کرتے ہوئے امریکی سفارتی مشن کے نائب سربراہ کو طلب کیا اور باضابطہ احتجاج ریکارڈ کرایا۔ بھارتی حکام نے واقعے کی مکمل وضاحت اور ذمہ داروں کے تعین کا مطالبہ بھی کیا ہے۔

یہ واقعہ ایسے وقت میں پیش آیا ہے جب خطے میں سکیورٹی صورتحال پہلے ہی حساس ہے اور اہم بحری راستوں پر نگرانی مزید سخت کی جا رہی ہے۔