ایران کے صدر مسعود پزشکیان نے امریکی صدر ڈونلڈ ٹرمپ کی جانب سے ممکنہ حملوں کی دھمکیوں پر سخت ردعمل دیتے ہوئے کہا ہے کہ ایران کسی بھی دباؤ، دھمکی یا جارحیت کے سامنے جھکنے والا نہیں اور اپنے قومی مفادات کا ہر قیمت پر دفاع کرے گا۔
سوشل میڈیا پر جاری بیان میں ایرانی صدر نے کہا کہ ملک اپنی قومی یکجہتی، عوامی عزم اور ماہرین کی صلاحیتوں پر مکمل اعتماد رکھتا ہے۔ ان کا کہنا تھا کہ بنیادی تنصیبات، بجلی گھروں، پانی کے ذخائر اور ٹرانسپورٹ نظام کو نشانہ بنانا طاقت نہیں بلکہ بے بسی اور بوکھلاہٹ کی علامت ہے۔
دوسری جانب ایران کی مجلس شوریٰ کے سربراہ ابراہیم عزیزی نے بھی واشنگٹن کو سخت پیغام دیتے ہوئے کہا کہ ایران کسی بھی ممکنہ تصادم سے خوفزدہ نہیں اور ہر قسم کی کارروائی کا بھرپور جواب دینے کی صلاحیت رکھتا ہے۔
ایرانی قیادت کے یہ بیانات ایسے وقت میں سامنے آئے ہیں جب ڈونلڈ ٹرمپ نے خبردار کیا تھا کہ اگر تہران کے ساتھ مذاکرات میں پیش رفت نہ ہوئی تو امریکا مزید سخت اقدامات اور حملوں پر غور کر سکتا ہے۔
حالیہ دنوں میں ایران اور امریکا کے درمیان کشیدگی میں اضافہ دیکھنے میں آیا ہے، جبکہ دونوں ممالک کی قیادت کی جانب سے سخت بیانات کے تبادلے نے خطے کی صورتحال کو مزید حساس بنا دیا ہے۔
