وزیراعظم شہباز شریف کی گلگت بلتستان میں شفاف الیکشن پر مبارکباد، پیپلز پارٹی کی برتری تسلیم کرتے ہوئے آصف زرداری اور بلاول بھٹو کو تہنیتی پیغام

اسلام آباد : وزیراعظم محمد شہباز شریف نے گلگت بلتستان اسمبلی کے عام انتخابات کے پرامن، آزادانہ اور شفاف انعقاد پر تمام اسٹیک ہولڈرز اور خطے کے عوام کو مبارکباد پیش کی ہے۔ اپنے ایک تہنیتی بیان میں وزیراعظم نے انتخابی نتائج میں پاکستان پیپلز پارٹی (پی پی پی) کی واضح برتری کا اعتراف کرتے ہوئے اسے اکثریتی جماعت قرار دیا ہے۔

وزیراعظم شہباز شریف کا کہنا تھا کہ گلگت بلتستان کے حالیہ انتخابی معرکے میں پاکستان پیپلز پارٹی سب سے بڑی سیاسی قوت بن کر ابھری ہے، جس پر وہ مبارکباد کی مستحق ہے۔ انہوں نے صدرِ مملکت آصف علی زرداری اور پاکستان پیپلز پارٹی کے چیئرمین بلاول بھٹو زرداری کو انتخابی میدان مارنے پر خصوصی طور پر مبارکباد پیش کی۔ وزیراعظم نے اس امید کا اظہار کیا کہ خطے میں نو منتخب حکومت عوامی فلاح و بہبود اور ترقی کے سفر کو تیز تر کرے گی۔

اپنے پیغام میں وزیراعظم نے پاکستان مسلم لیگ (ن) کے تنظیمی ڈھانچے اور انتخابی ٹیم کو بھی بھرپور سراہا۔ انہوں نے کہا کہ مسلم لیگ (ن) کی مقامی قیادت اور کارکنان نے انتخابات کے دوران دن رات انتہائی سخت محنت کی جس پر وہ شاباش کے مستحق ہیں۔ وزیراعظم نے گلگت بلتستان اسمبلی کے انتخابات میں کامیابی حاصل کرنے والے مسلم لیگ (ن) کے تمام امیدواروں کو مبارکباد دیتے ہوئے کہا کہ وہ مستقبل میں خطے کے عوام کی آواز بن کر ان کی خدمت کا حق ادا کریں