آن لائن فراڈ اور نوسر بازی کی بڑی لہر: فیک ویب سائٹ کے ذریعے شہریوں سے لاکھوں روپے لوٹ لیے گئے، درگئی کے شہری کے 25 لاکھ ڈوب گئے
بٹ خیلہ : مالاکنڈ ڈویژن کی تحصیل درگئی اور گردونواح میں آن لائن فراڈ اور نوسر بازی کا ایک بڑا اسکینڈل سامنے آیا ہے، جہاں ایک سوچی سمجھی سازش کے تحت ’سکیل ٹیکنالوجی‘ (Skill Technology) نامی فیک ویب سائٹ کے ذریعے درجنوں شہریوں کو لاکھوں روپے کا چونا لگا دیا گیا ہے۔ سب سے بڑا نقصان تحصیل درگئی کے ایک مقامی شہری کو ہوا ہے، جس نے منافع کے لالچ میں آ کر اپنی زندگی کی جمع پونجی یعنی 25 لاکھ روپے اس جعلی اسکیم میں انوسٹ کر دیے تھے۔
حسبان میڈیا کو موصول ہونے والی اطلاعات کے مطابق، یہ جعلی ویب سائٹ سال 2024 کے اواخر میں منظرِ عام پر آئی تھی۔ نوسر بازوں نے شہریوں کا اعتماد حاصل کرنے کے لیے ملک کے بڑے شہروں بشمول اسلام آباد، لاہور اور کراچی میں باقاعدہ پرتعیش دفاتر کھول رکھے تھے اور متحرک تشہیر کے لیے چند پرکشش پروگرامز کا انعقاد بھی کیا گیا تھا۔ یہ فراڈ نیٹ ورک امریکہ کے کاروباری حضرات کے فرضی ناموں کا سہارا لے کر جعلی طریقے سے چلایا جا رہا تھا، جس کا مقصد پاکستانیوں کو زیادہ سے زیادہ منافع کا لالچ دے کر رقم بٹورنا تھا۔
متاثرہ ذرائع کے مطابق، سکیل ٹیکنالوجی کی جانب سے کراچی کے ایک نجی بینک میں 'SA Technology' کے نام سے ایک کارپوریٹ اکاؤنٹ بھی کھولا گیا تھا تاکہ سرمایہ کاروں کو یہ ایک قانونی کمپنی لگے۔ فراڈ کرنے والوں نے رواں سال 20 اپریل کو ایپ اپ ڈیٹ اور آڈٹ کا بہانہ بنا کر ویب سائٹ کو 35 روز کے لیے منجمد کیا اور اب یہ فیک ویب سائٹ مکمل طور پر بند کر کے نوسر باز غائب ہو چکے ہیں۔ اس بڑے مالیاتی دھوکے کا شکار ہونے والے متاثرین نے وفاقی تحقیقاتی ادارے (FIA) اور سائبر کرائم ونگ سے فوری مداخلت کی اپیل کی ہے کہ 'سکیل ٹیکنالوجی' کے مالکان کا سراغ لگا کر غریب عوام کے لوٹے ہوئے پیسے واپس دلائے جائیں اور ملزمان کو سخت ترین سزا دی جائے۔
