اسلام آباد: سابق قومی کرکٹ کپتان اور سوئنگ کے سلطان وسیم اکرم نے کہا ہے کہ ان کے لیے مناسکِ حج کی ادائیگی مشکل نہیں تھی، تاہم وہاں موجود مداحوں کی جانب سے تصاویر بنوانے کے بے پناہ اصرار نے انہیں زیادہ تھکا دیا۔

مانیٹرنگ ڈیسک کے مطابق، سابق قومی کپتان وسیم اکرم نے رواں سال سابق کپتان مصباح الحق اور معروف ٹی وی پریزنٹر فخرِ عالم کے ہمراہ حج کی سعادت حاصل کی ہے، جس کی تصاویر اور ویڈیوز سوشل میڈیا پر مسلسل گردش کر رہی ہیں۔ انسٹاگرام پر شیئر کی گئی ایک حالیہ ویڈیو میں فخرِ عالم نے وسیم اکرم سے ذیابیطس (شوگر) کا مریض ہونے کے باعث حج کے دوران پیش آنے والی طبی مشکلات کے بارے میں سوال کیا۔ اس پر وسیم اکرم نے انکشاف کیا کہ وہ شدید گرمی میں اپنی انسولین کو محفوظ رکھنے کے لیے ایک خاص منجمد فریز پاؤچ ساتھ لے کر گئے تھے، جو 24 گھنٹے تک کارآمد رہتی تھی اور اس طرح انہوں نے اپنی بیماری کو بہترین طریقے سے مینیج کیا۔

سابق کپتان کا کہنا تھا کہ اصولی طور پر حج ایک مشکل عبادت نہیں ہے کیونکہ انسان وہاں خالصتاً عبادت کی نیت سے جاتا ہے اور ہر صاحبِ استطاعت مسلمان کے لیے زندگی میں ایک بار یہ فریضہ ادا کرنا ضروری ہے۔ تاہم انہوں نے اپنے ایک تجربے کا ذکر کرتے ہوئے بتایا کہ منیٰ میں نمازِ عید کی ادائیگی کے بعد متعدد افراد اور مداح یکدم ان کے پاس تصاویر بنوانے کے لیے جمع ہو گئے، جس کی وجہ سے وہ جسمانی طور پر کافی تھکاوٹ کا شکار ہو گئے۔ وسیم اکرم نے حج کو اپنی زندگی کا بہترین اور یادگار ترین تجربہ قرار دیتے ہوئے کہا کہ انہوں نے اس مقدس سفر کے دوران سب کے لیے خصوصی دعائیں بھی کی ہیں۔