گورنر خیبر پختونخوا فیصل کریم کنڈی نے واضح الفاظ میں اعلان کیا ہے کہ سابقہ فاٹا اور پاٹا کے علاقوں میں کسی بھی قسم کے ٹیکسوں کا نفاذ کسی بھی صورت قبول نہیں کیا جائے گا۔ انہوں نے خبردار کیا کہ اگر ان علاقوں پر زبردستی ٹیکس عائد کرنے کی کوشش کی گئی تو اس کے خلاف بھرپور سیاسی اور قانونی حکمتِ عملی اختیار کی جائے گی۔ ان خیالات کا اظہار انہوں نے تیمرگرہ میں پاکستان پیپلز یوتھ اور پیپلز اسٹوڈنٹس فیڈریشن کے زیرِ اہتمام منعقدہ ورکرز کنونشن سے بطورِ مہمانِ خصوصی خطاب کرتے ہوئے کیا۔ کنونشن میں ضلع بھر سے پارٹی کارکنوں، نوجوانوں اور مقامی رہنماؤں کی ایک بڑی تعداد نے شرکت کی، جس سے پنڈال "جیے بھٹو" کے نعروں سے گونج اٹھا۔
اپنے خطاب کے دوران گورنر فیصل کریم کنڈی نے صوبائی حکومت کی پالیسیوں پر شدید تنقید کرتے ہوئے کہا کہ اڈیالہ جیل کے سامنے دھرنے دینے، نعرے بازی اور گالم گلوچ کے کلچر سے صوبے کے دیرینہ مسائل حل نہیں ہوں گے۔ انہوں نے زور دیا کہ عوامی مسائل کے حل کے لیے عملی اقدامات، بہتر طرزِ حکمرانی اور سنجیدہ سیاسی حکمتِ عملی اپنانے کی ضرورت ہے۔ صوبے میں بدامنی کی حالیہ لہر پر تشویش کا اظہار کرتے ہوئے ان کا کہنا تھا کہ صوبے میں روزانہ سیکیورٹی فورسز کے اہلکار قربانیاں دے رہے ہیں، لیکن اس کے باوجود صوبائی حکومت دہشت گردوں سے مذاکرات کی باتیں کر رہی ہے جو کہ انتہائی افسوسناک ہے۔
گورنر نے مزید کہا کہ صوبائی حکومت کی نااہلی کے باعث صوبے کے عوام ترقیاتی منصوبوں، روزگار اور بنیادی سہولیات سے یکسر محروم ہیں۔ انہوں نے دعویٰ کیا کہ پنجاب سے گندم کے کوٹے کی بحالی اور سی این جی اسٹیشنوں کی بندش کا خاتمہ ان کی ذاتی کوششوں کا نتیجہ ہے، جبکہ صوبائی حکومت ان اہم معاملات پر مکمل طور پر غیر فعال رہی۔ تحریک انصاف کے اندرونی اختلافات کا حوالہ دیتے ہوئے انہوں نے انکشاف کیا کہ پی ٹی آئی کی صفوں میں غدار موجود ہیں۔ اس موقع پر پیپلز پارٹی کے صوبائی صدر محمد علی شاہ باچا، ضلعی صدر نوابزادہ احمد زیب، جنرل سیکرٹری نعیم خان اور سیکرٹری اطلاعات نوابزادہ عرفان خان سمیت دیگر قائدین نے بھی خطاب کیا اور پارٹی کے عزم کا اعادہ کیا۔
