وانا (اسپیشل رپورٹر): جنوبی وزیرستان لوئر کے تجارتی مرکز وانا میں رستم بازار کے قریب ایک خوفناک ریموٹ کنٹرول بم دھماکے کے نتیجے میں احمد زئی وزیر قبیلے کے نامور سربراہ سمیت 3 افراد جاں بحق اور 4 دیگر شدید زخمی ہو گئے ہیں۔ ضلعی پولیس سربراہ (ڈی پی او) محمد طاہر نے واقعے کی تصدیق کرتے ہوئے بتایا کہ جاں بحق ہونے والوں میں قبیلے کے سینیئر ترین رہنما بھی شامل ہیں۔

پولیس کے ابتدائی بیانات کے مطابق، دہشت گردوں کی جانب سے رستم بازار کے مصروف علاقے کے قریب قبائلی سربراہ کی گاڑی کو نشانہ بنایا گیا۔ دھماکہ خیز مواد سڑک کے کنارے نصب تھا، جسے گاڑی کے گزرتے ہی ریموٹ کنٹرول کے ذریعے اڑا دیا گیا، جس سے گاڑی کو شدید نقصان پہنچا۔

افسوسناک واقعے کی اطلاع ملتے ہی سیکیورٹی فورسز اور پولیس کی بھاری نفری نے فوری طور پر جائے وقوعہ پر پہنچ کر پورے علاقے کو گھیرے میں لے لیا اور شواہد اکٹھے کرتے ہوئے وسیع پیمانے پر تحقیقات کا آغاز کر دیا ہے۔ ریسکیو اہلکاروں نے دھماکے کے نتیجے میں جاں بحق ہونے والے افراد کی لاشوں اور زخمیوں کو فوری طور پر قریبی ہیڈ کوارٹر اسپتال منتقل کیا، جہاں زخمیوں کو طبی امداد فراہم کی جا رہی ہے اور بعض کی حالت تشویشناک بتائی جاتی ہے۔ انتظامیہ کی جانب سے وانا اور گردونواح میں سیکیورٹی ہائی الرٹ کر دی گئی ہے۔