ایرانی صدر کا معنی خیز پیغام: 4500 سال پرانے قدیم ترین درخت 'سروِ ابرکوہ' کی تصویر جاری، دشمنوں کو سخت انتباہ

تہران (آئی این پی): ایرانی صدر مسعود پزیشکیان نے وسطی ایران کے تاریخی صوبے یزد میں واقع دنیا کے قدیم ترین جانداروں میں شمار ہونے والے نایاب درخت کی تصویر ایک گہرے معنی خیز پیغام کے ساتھ سوشل میڈیا پر شیئر کر دی ہے۔ سوشل میڈیا پلیٹ فارم 'ایکس' (سابقہ ٹویٹر) پر جاری اپنے اس بیان میں ایرانی صدر نے براہِ راست ملک کے دشمنوں کو مخاطب کرتے ہوئے ایک مضبوط سیاسی اور تاریخی پیغام دیا ہے۔

ایرانی صدر مسعود پزیشکیان نے اپنی پوسٹ میں واضح کیا کہ یہ عظیم الشان درخت اس بات کی علامت ہے کہ ایران اپنی سرزمیں میں انتہائی گہری اور مضبوط جڑیں رکھتا ہے، اور دنیا کی کوئی بھی طاقت اسے اپنی جگہ سے اکھاڑ نہیں سکتی۔ انہوں نے مزید لکھا کہ 'سروِ ابرکوہ' نامی یہ قدیم ترین سرو کا درخت ایشیا کا قدیم ترین زندہ جاندار ہے، جس کی عمر کم از کم 4 ہزار 500 سال ہے، اور یہ اسی سرزمین سے جڑا ہوا ہے جو اس وقت بھی 'ایران' کے نام سے جانی جاتی تھی۔

واضح رہے کہ اس تاریخی درخت کو 'زرتشتی سرو' بھی کہا جاتا ہے، جو ایران کے صوبہ یزد کے شہر ابرکوہ میں واقع ہے۔ ماہرینِ آثارِ قدیمہ اور نباتیات کے مطابق اس درخت کی عمر 4 ہزار سے 5 ہزار سال کے درمیان ہے، جو اسے نہ صرف ایشیا بلکہ دنیا کے قدیم ترین جانداروں کی فہرست میں شامل کرتی ہے۔ صدر پزیشکیان کا یہ بیان ایک ایسے وقت میں سامنے آیا ہے جب خطے میں جغرافیائی اور سیاسی تناؤ عروج پر ہے، اور مبصرین اسے ایران کی تاریخی بقا اور مزاحمت کی ایک طاقتور علامت قرار دے رہے ہیں۔